(ញូវដេលី)៖ គម្រោងវិនិយោគដ៏ធំបំផុតមិនធ្លាប់មានរបស់ក្រុមហ៊ុនបច្ចេកវិទ្យាយក្សអាមេរិក Google នៅក្នុងប្រទេសឥណ្ឌា ទំហំ ១៥ប៊ីលានដុល្លារអាមេរិក (១៥ពាន់លានដុល្លារ) ដើម្បីកសាងមជ្ឈមណ្ឌលទិន្នន័យ និងមជ្ឈមណ្ឌលបញ្ញាសិប្បនិម្មិត (AI Hub) នៅក្នុងក្រុង Visakhapatnam រដ្ឋ Andhra Pradesh កំពុងជួបប្រទះនឹងឧបសគ្គផ្លូវច្បាប់ និងរលកនៃការតវ៉ាយ៉ាងខ្លាំងក្លាពីសំណាក់ក្រុមអ្នកបរិស្ថានវិទ្យា និងប្រជាពលរដ្ឋក្នុងស្រុក ជុំវិញក្តីបារម្ភពីការខ្វះខាតទឹកស្អាត និងការរំលោភលើតំបន់អភិរក្សសត្វព្រៃ។ នេះបើយោងតាមការចុះផ្សាយព័ត៌មានស៊ើបអង្កេតរបស់ទីភ្នាក់ងារសារព័ត៌មាន Reuters កាលពីថ្ងៃព្រហស្បតិ៍ ទី០៦ ខែសីហា ឆ្នាំ២០២៦។

ទោះបីជារដ្ឋាភិបាលរដ្ឋ Andhra Pradesh ដែលជាសម្ព័ន្ធមិត្តរបស់នាយករដ្ឋមន្ត្រី Narendra Modi បានខិតខំជម្រុញការដ្ឋានរៀបចំដី និងបដិសេធការចោទប្រកាន់ថាខ្លួនបានជាប់នូវការវាយតម្លៃផលប៉ះពាល់បរិស្ថានក៏ដោយ ប៉ុន្តែសកម្មជន និងអង្គការសង្គមស៊ីវិលបានចាប់ផ្តើមធ្វើបាតុកម្មនៅតាមដងផ្លូវ និងឆ្នេរខ្សាច់ ជាមួយនឹងបដាដែលមានខ្លឹមសារថា «ពួកយើងមិនអាចផឹក DATA បានទេ» ព្រមទាំងបានគូសរូបខ្នោះដៃលើឡូហ្គោ Google ដើម្បីបង្ហាញការប្រឆាំង។

ផ្អែកតាមទិន្នន័យពីអង្គការក្រៅរដ្ឋាភិបាល Green Visakha ទីក្រុង Visakhapatnam ដែលមានប្រជាជន ២.៥ លាននាក់ កំពុងប្រឈមមុខនឹងវិបត្តិខ្វះខាតទឹកស្រាប់ទៅហើយ ដោយតម្រូវការប្រចាំថ្ងៃមានប្រមាណ ៤៨០លានលីត្រ ប៉ុន្តែសមត្ថភាពផ្គត់ផ្គង់ជាក់ស្តែងមានត្រឹមតែ ៤១០លានលីត្រប៉ុណ្ណោះ។ ការកសាងមជ្ឈមណ្ឌលទិន្នន័យ AI កម្លាំង ១ Gigawatt ដែលត្រូវប្រើប្រាស់ទឹកត្រជាក់រាប់លានលីត្រជារៀងរាល់ថ្ងៃដើម្បីត្រជាក់ម៉ាស៊ីន Server ត្រូវបានគេព្រមានថានឹងធ្វើឱ្យវិបត្តិទឹកស្អាតរបស់ពលរដ្ឋកាន់តែធ្ងន់ធ្ងរ។ បន្ថែមពីនេះ ទីតាំងគម្រោងស្ថិតនៅជិតតំបន់ជម្រកសត្វព្រៃដែលជាជម្រករបស់សត្វខ្លារខិន និងសត្វពង្រូល៕