(បរទេស)៖ ក្រុមហ៊ុនបច្ចេកវិទ្យាយក្សពីរគឺ Sony Group របស់ជប៉ុន និង TSMC របស់តៃវ៉ាន់ មានផែនការបោះទុនវិនិយោគរួមគ្នារហូតដល់ប្រមាណ ១ ទ្រីលានយ៉េន (ប្រហែល ៦,៣២ ពាន់លានដុល្លារ) ដើម្បីអភិវឌ្ឍ និងផលិតបន្ទះឈីបជំនាន់ថ្មីសម្រាប់ប្រើប្រាស់ក្នុងសែនស័ររូបភាព (Image Sensors)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១០ ខែសីហា ឆ្នាំ២០២៦ ដោយដកស្រង់ប្រភពពីកាសែតធុរកិច្ច Nikkei។

តាមប្រភពដដែលបានឱ្យដឹងថា កិច្ចសហការជាប្រវត្តិសាស្ត្រនេះនឹងបង្កើតជាក្រុមហ៊ុនសហការរួម (Joint Venture) មួយ ដោយ Sony កាន់កាប់ភាគហ៊ុន ៦០% និង TSMC កាន់កាប់ ៤០%។ សង្វាក់ផលិតកម្មលក្ខណៈពាណិជ្ជកម្ម ត្រូវគេរំពឹងថានឹងចាប់ផ្តើមដំណើរការយ៉ាងឆាប់បំផុតនៅឆ្នាំ២០២៩ នៅក្នុងខេត្ត Kumamoto ភាគខាងត្បូងប្រទេសជប៉ុន។

កិច្ចសហប្រតិបត្តិការនេះ ជាការរួមផ្សំគ្នារវាង «ជំនាញរចនាសែនស័រដ៏លេចធ្លោរបស់ Sony» និង «កម្លាំងផលិតកម្មបន្ទះឈីបដ៏ខ្លាំងក្លារបស់ TSMC»។ ក្រៅពីការផលិតសែនស័រសម្រាប់ទូរស័ព្ទឆ្លាតវៃ និងរថយន្ត កិច្ចសហការនេះមានគោលដៅចម្បងក្នុងការស្វែងរកឱកាសក្នុងវិស័យ Physical AI (បច្ចេកវិទ្យាបញ្ញាសិប្បនិម្មិតដែលដំណើរការលើឧបករណ៍រូបវន្ត) ដូចជា ប្រព័ន្ធបើកបរស្វ័យប្រវត្តិ និងបច្ចេកវិទ្យារ៉ូបូតជាដើម។

គួររំលឹកផងដែរថា Sony គឺជាក្រុមហ៊ុនផលិតសែនស័ររូបភាពធំជាងគេលើពិភពលោក ខណៈដែល TSMC គឺជាក្រុមហ៊ុនផលិតបន្ទះឈីបតាមកិច្ចសន្យាធំជាងគេលើពិភពលោក។ យ៉ាងណាមិញ ពាក់ព័ន្ធនឹងរបាយការណ៍បែកធ្លាយរបស់ Nikkei នេះ ភាគី Sony បានបដិសេធមិនធ្វើអត្ថាធិប្បាយនោះទេ ខណៈ TSMC មិនទាន់មានការឆ្លើយតបភ្លាមៗចំពោះសំណើសុំការអត្ថាធិប្បាយនៅឡើយទេ៕