(បរទេស)៖ ក្រុមហ៊ុនបច្ចេកវិទ្យាយក្ស Apple ត្រូវបានគេរាយការណ៍ថា បាន និងកំពុងធ្វើតេស្តបន្ទះឈីបអង្គចងចាំ (Memory Chips) ពីក្រុមហ៊ុន CXMT ដែលជាក្រុមហ៊ុនផលិតបន្ទះឈីបធំជាងគេរបស់ចិន នៅលើខ្សែសង្វាក់ផលិតផលសំខាន់ៗ រួមមាន iPhone និង MacBook។ ការបោះជំហាននេះធ្វើឡើងក្នុងគោលបំណងដោះស្រាយ និងកាត់បន្ថយបញ្ហាកង្វះខាតសមាសភាគផលិតផល ដែលបណ្តាលមកពីការកើនឡើងយ៉ាងគំហុកនៃតម្រូវការបច្ចេកវិទ្យា AI (AI Boom)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters ដោយដកស្រង់ប្រភពពីកាសែត Wall Street Journal។

យោងតាមប្រភពជិតស្និទ្ធនឹងរឿងនេះ បានឱ្យដឹងថា Apple បានបើកការពិភាក្សាជុំដំបូងជាមួយ CXMT ដែលជាក្រុមហ៊ុនផលិតបន្ទះឈីបមានតម្លៃទីផ្សារធំជាងគេនៅចិន លើការផ្គត់ផ្គង់សមាសភាគ ដោយមានគោលដៅដំបូងក្នុងការយកទៅប្រើប្រាស់លើឧបករណ៍មួយចំនួនដែលត្រូវដាក់លក់នៅក្នុងទីផ្សារប្រទេសចិន។

មិនមែនមានតែ Apple នោះទេ ក្រុមហ៊ុនផលិតកុំព្យូទ័រយួរដៃធំៗផ្សេងទៀតដូចជា HP និង Acer ក៏បានចាប់ផ្តើមប្រើប្រាស់បន្ទះឈីបអង្គចងចាំរបស់ CXMT នៅក្នុងឧបករណ៍ដែលលក់នៅក្រៅសហរដ្ឋអាមេរិក ដើម្បីសម្រួលដល់បញ្ហាកង្វះខាតការផ្គត់ផ្គង់ផងដែរ។ ស្របពេលជាមួយគ្នានេះ ក្រុមហ៊ុន CXMT ក៏កំពុងពិចារណាសាងសង់រោងចក្រផលិតបន្ទះឈីបទីពីរនៅក្នុងក្រុងប៉េកាំង ដើម្បីបង្កើនទិន្នផល និងពង្រីកសមត្ថភាពផលិតកម្មរបស់ខ្លួនបន្ថែមទៀត។

យ៉ាងណាមិញ ជុំវិញរបាយការណ៍បែកធ្លាយនេះ ភ្នាក់ងារសារព័ត៌មាន Reuters បានបញ្ជាក់ថា មិនទាន់អាចផ្ទៀងផ្ទាត់របាយការណ៍នេះភ្លាមៗនៅឡើយទេ ខណៈដែលភាគីខាង Apple និង CXMT ក៏មិនទាន់មានការឆ្លើយតបចំពោះសំណើសុំការអត្ថាធិប្បាយនៅឡើយដែរ៕