(បរទេស)៖ នៅក្នុងការប្រកួតប្រជែងសកលលើការកែលម្អប្រព័ន្ធព្យាករណ៍ធាតុអាកាស ប្រទេសចិនបានលេចធ្លោឡើងជាតួអង្គឈានមុខគេ ដោយបានដាក់ឱ្យប្រើប្រាស់ប្រព័ន្ធបញ្ញាសិប្បនិម្មិត (AI) ជំនាន់ថ្មី ដើម្បីធ្វើការទន្ទឹមគ្នាជាមួយប្រព័ន្ធព្យាករណ៍បែបប្រពៃណី។ ជាក់ស្តែង កំឡុងពេលដែលខ្យល់ព្យុះ Dolphin កំពុងបក់ឆ្ពោះទៅកាន់ដែនដីចិន ប្រព័ន្ធ AI របស់ចិនដូចជា Fengwu (របស់ Shanghai AI Lab), Pangu (របស់ Huawei) និង Fuxi (របស់សាកលវិទ្យាល័យ Fudan) កំពុងត្រូវបានធ្វើតេស្តយ៉ាងសកម្មក្នុងការប្រមាញ់ និងតាមដានផ្លូវធ្វើដំណើររបស់ព្យុះនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១១ ខែសីហា ឆ្នាំ២០២៦។

អស់រយៈពេលជាច្រើនទសវត្សរ៍មកហើយ ការព្យាករណ៍ធាតុអាកាសត្រូវពឹងផ្អែកលើគំរូលេខគណិតដ៏ស្មុគស្មាញដែលដំណើរការលើកំពូលកុំព្យូទ័រ (Supercomputers)។ ប៉ុន្តែគំរូ AI ជំនាន់ថ្មីនេះ ដំណើរការដោយការសិក្សាពីទិន្នន័យប្រវត្តិសាស្ត្រធាតុអាកាសរាប់បំណែក ដែលអនុញ្ញាតឱ្យវាបង្កើតការទស្សន៍ទាយបានក្នុងរយៈពេលយ៉ាងខ្លី និងមានភាពត្រឹមត្រូវខ្ពស់។ ក្រុមអ្នកស្រាវជ្រាវបានគូសបញ្ជាក់ថា៖ «គំរូ AI អាចបង្កើតការទស្សន៍ទាយបានលឿនជាងប្រព័ន្ធប្រពៃណីឆ្ងាយណាស់ ខណៈពេលដែលមានភាពត្រឹមត្រូវស្មើ ឬលើសប្រព័ន្ធប្រពៃណីលើរង្វាស់រង្វាល់មួយចំនួន»។

ការជឿនលឿននៃបច្ចេកវិទ្យានេះ មានសារៈសំខាន់ខ្លាំងណាស់សម្រាប់តំបន់អាស៊ីបូព៌ាក្នុងរដូវកាលខ្យល់ព្យុះ ព្រោះសូម្បីតែការកែលម្អការទស្សន៍ទាយផ្លូវព្យុះបានត្រឹមតែបន្តិចបន្តួច ក៏អាចជួយឱ្យអាជ្ញាធរមានពេលគ្រប់គ្រាន់ក្នុងការរៀបចំផែនការឆ្លើយតបគ្រោះទឹកជំនន់ ជម្លៀសប្រជាជនបានទាន់ពេលវេលា និងកាត់បន្ថយការរំខានដល់ប្រព័ន្ធដឹកជញ្ជូនផងដែរ។

គួរជម្រាបថា ការទស្សន៍ទាយធាតុអាកាសដោយ AI បានក្លាយជា «សង្វៀនប្រកួតប្រជែងថ្មី» យ៉ាងស្វិតស្វាញរវាងក្រុមហ៊ុនបច្ចេកវិទ្យាយក្ស និងវិទ្យាស្ថានស្រាវជ្រាវជុំវិញពិភពលោក។ ក្រៅពីប្រព័ន្ធ AI របស់ចិន ទីផ្សារសកលក៏មានការចូលរួមពីប្រព័ន្ធ AI ល្បីៗផ្សេងទៀតដូចជា GraphCast និង GenCast របស់ Google, FourCastNet ដែលគាំទ្រដោយ Nvidia និងប្រព័ន្ធ AIFS របស់មជ្ឈមណ្ឌលព្យាករណ៍អាកាសធាតុអឺរ៉ុប (ECMWF) ផងដែរ៕