(ភ្នំពេញ)៖ ក្លិបបាល់ទាត់ភ្នំពេញក្រោន របស់កម្ពុជា នឹងត្រូវជួបក្រុមម្ចាស់ផ្ទះ Melaka FC របស់ម៉ាឡេសុី នាវេលាម៉ោង ៧៖៣០នាទីយប់នេះ (ម៉ោងនៅកម្ពុជា) នៅថ្ងៃទី១៧ ខែសីហា ឆ្នាំ២០២៦ ក្នុងជំនួបវគ្គផ្ដាច់ព្រ័ត្រពានរង្វាន់លក្ខណៈមិត្តភាពអន្ដរជាតិ International 4 Triangle Tournament Malacca Governor's 76th Anniversary Cup 2026 នៅប្រទេសម៉ាឡេស៊ី។

ការប្រកួតពានរង្វាន់លក្ខណៈ Pre-Season ដើម្បីត្រៀមរដូវកាលថ្មីនេះ មានបេក្ខភាព ៤ក្លិប មកពី ៤ប្រទេសចូលរួម ដែលធ្វើការប្រកួត ២ថ្ងៃ កាលពីថ្ងៃទី១៥ ខែសីហា គឺជំនួបខ្វែង ឬវគ្គពាក់កណ្ដាលផ្ដាច់ព្រ័ត្រ ដោយក្រុមភ្នំពេញក្រោន បានយកឈ្នះក្រុម Persik Kediri FC របស់ឥណ្ឌូនេសុី ដោយលទ្ធផល ៤-០ និងក្រុម Melaka FC បានយកឈ្នះក្រុមភ្ញៀវ Jurong FC របស់សិង្ហបុរី ដោយលទ្ធផល ២-១។

ជ័យជម្នះនេះនាំឲ្យភ្នំពេញក្រោន និងក្រុម Melaka FC ត្រូវឡើងមកជួបគ្នាវគ្គផ្ដាច់ព្រ័ត្រ នៅរាត្រីថ្ងៃទី១៧ ខែសីហានេះ ដើម្បីស្វែងរកក្រុមម្ចាស់ផ្ទះពានរង្វាន់មិត្តភាពអន្ដរជាតិខាងលើ។ ប៉ុន្ដែមុនឈានដល់គូដណ្ដើមជើងឯក ក៏នឹងមានការប្រកួតដណ្ដើមចំណាត់ថ្នាក់លេខ៣ រវាងក្រុម Persik Kediri FC និងក្រុម Jurong FC នៅរសៀលថ្ងៃជាមួយគ្នានេះផងដែរ៕