(បរទេស)៖ ឯកសារអនុវត្តច្បាប់ដែលទទួលបានដោយភ្នាក់ងារសារព័ត៌មាន Reuters បានបង្ហាញថា ក្រុមហ៊ុនផ្លាស់ប្តូររូបិយប័ណ្ណគ្រីបតូ (Cryptocurrency) ដ៏ធំបំផុតក្នុងលោក Binance កាលពីឆ្នាំមុន បានប្រគល់ព័ត៌មានលម្អិតអំពីការបរិច្ចាគប្រាក់ទៅឱ្យអាជ្ញាធររុស្ស៊ី។ ទិន្នន័យទាំងនោះ ត្រូវបានសមត្ថកិច្ចរុស្ស៊ីយកទៅប្រើប្រាស់ជាភស្តុតាង ដើម្បីចោទប្រកាន់អ្នកជំនាញបច្ចេកវិទ្យា (IT) ជនជាតិរុស្ស៊ីម្នាក់ឈ្មោះ Yuri Belenkiy ពីបទ «ផ្តល់ហិរញ្ញប្បទានដល់ភេរវកម្ម» បន្ទាប់ពីរូបគេបានផ្ញើប្រាក់ជាង ៧០០ ដុល្លារ ទៅគាំទ្រកងទ័ពអ៊ុយក្រែន និងក្រុមសកម្មប្រយុទ្ធ Azov ដែលក្រុងម៉ូស្គូចាត់ទុកជាអង្គការភេរវករ។

ករណីនេះបានចោទជាសំណួរផ្លូវច្បាប់យ៉ាងក្តៅគគុក ដោយសារតែក្រុមហ៊ុន Binance ធ្លាប់បានប្រកាសកាលពីខែកញ្ញា ឆ្នាំ២០២៣ ថា ខ្លួនបានដកខ្លួន និងបញ្ឈប់ប្រតិបត្តិការអាជីវកម្មទាំងអស់ចេញពីប្រទេសរុស្ស៊ីទាំងស្រុងហើយ។ អ្នកច្បាប់មួយចំនួនបានលើកឡើងថា Binance គ្មានកាតព្វកិច្ចត្រូវផ្តល់ទិន្នន័យឱ្យអាជ្ញាធររុស្ស៊ីនោះទេ ហើយសកម្មភាពនេះថែមទាំងអាចល្មើសនឹងច្បាប់ការពារទិន្នន័យរបស់សហភាពអឺរ៉ុបទៀតផង។ ទោះជាយ៉ាងណា Binance បានបដិសេធការចោទប្រកាន់នេះ ដោយបញ្ជាក់ក្នុងសេចក្តីថ្លែងការណ៍ថា៖ «Binance មិនបានបង្កើត ឬអនុវត្តច្បាប់នៃដែនសមត្ថកិច្ចណាមួយ បញ្ជាក់ពីការចោទប្រកាន់ ឬសម្រេចថា រដ្ឋាភិបាលប្រើប្រាស់ព័ត៌មានក្នុងនីតិវិធីច្បាប់យ៉ាងដូចម្តេចនោះទេ។ ដូចគ្រឹះស្ថានហិរញ្ញវត្ថុពិភពលោកដទៃទៀតដែរ យើងសហការជាមួយសំណើព័ត៌មានស្របច្បាប់ពីភ្នាក់ងារអនុវត្តច្បាប់ទូទាំងពិភពលោក ដោយផ្អែកលើតម្រូវការច្បាប់ ឯកជនភាព និងបទប្បញ្ញត្តិដែលអាចអនុវត្តបាន»។

បច្ចុប្បន្ន លោក Belenkiy ដែលមានប័ណ្ណស្នាក់នៅក្នុងប្រទេសប៊ុលហ្គារី ត្រូវបានឃាត់ខ្លួនតាំងពីខែកញ្ញា ឆ្នាំ២០២៥ ហើយកំពុងជាប់ឃុំឃាំងក្នុងពន្ធនាគាររុស្ស៊ីដើម្បីរង់ចាំការជំនុំជម្រះ។ ឯកសារចោទប្រកាន់ទាំងនេះត្រូវបានលេចធ្លាយតាមរយៈអង្គការសិទ្ធិមនុស្ស «The First Department» ដែលជាអ្នកផ្តល់ជំនួយផ្លូវច្បាប់ដល់ជនរងគ្រោះក្នុងករណីនយោបាយនៅរុស្ស៊ី។ គួររំលឹកផងដែរថា នេះមិនមែនជាលើកទីមួយទេដែល Binance រងការសង្ស័យជុំវិញការសហការជាមួយក្រុងម៉ូស្គូ ដោយកាលពីឆ្នាំ២០២១ នាយកប្រចាំតំបន់របស់ក្រុមហ៊ុននេះក៏ធ្លាប់បានជួបប្រជុំជាមួយមន្ត្រីរុស្ស៊ី ដើម្បីជួយកំណត់អត្តសញ្ញាណអ្នកបរិច្ចាគប្រាក់ឱ្យអ្នកនយោបាយប្រឆាំងលោក Alexei Navalny ផងដែរ ប៉ុន្តែ Binance បានបដិសេធការអះអាងនោះ។

គួរជម្រាបថា​ សកម្មភាពចុងក្រោយរបស់ Binance បានធ្វើឱ្យអ្នកតាមដាន និងប្រជាពលរដ្ឋរស់នៅក្នុងតំបន់អឺរ៉ុបមានការភ្ញាក់ផ្អើល និងព្រួយបារម្ភយ៉ាងខ្លាំង។ លោក Dmitry Zair-Bek ប្រធានអង្គការ The First Department បានប្រាប់ Reuters ថា៖ «អ្នកស្នាក់នៅក្នុងសហភាពអឺរ៉ុប ពិបាកនឹងស្រមៃណាស់ថា ក្រុមហ៊ុនយក្សផ្នែកគ្រីបតូដែលបានប្រកាសថាខ្លួនកំពុងចាកចេញពីប្រទេសរុស្ស៊ី តាមពិតនៅតែរក្សាបណ្តាញទំនាក់ទំនងជាមួយភ្នាក់ងារអនុវត្តច្បាប់នៃប្រទេសនោះ។ ហើយនៅក្នុងសុបិនអាក្រក់បំផុតរបស់ពួកគេ អ្នកស្នាក់នៅក្នុង EU នឹងមិនស្រមៃថា ក្រុមហ៊ុនយក្សគ្រីបតូដដែលនេះ នឹងប្រគល់ព័ត៌មានរបស់ពួកគេនៅពេលសួរលើកដំបូង ទៅឱ្យអ្នកស៊ើបអង្កេតដែលធ្វើសកម្មភាពបង្ក្រាបផ្នែកនយោបាយនោះទេ»៕