(ប៉េកាំង)៖ ក្រុមហ៊ុន ByteDance ដែលជាក្រុមហ៊ុនមេរបស់បណ្តាញសង្គម TikTok បានចុះកិច្ចព្រមព្រៀងជាប្រវត្តិសាស្ត្រមួយជាមួយសមាគមភាពយន្ត Motion Picture Association (MPA) ដែលជានិយោជក និងជាតំណាងស្ទូឌីយោភាពយន្តធំៗនៅហូលីវូដ ដើម្បីពង្រឹងវិធានការការពាររក្សាសិទ្ធិ (Copyright) លើម៉ូឌែលបង្កើតវីដេអូ និងរូបភាព AI របស់ខ្លួន។

កិច្ចព្រមព្រៀងនេះធ្វើឡើងបន្ទាប់ពីមានការរិះគន់ និងជម្លោះផ្លូវច្បាប់ជាច្រើនខែ ពាក់ព័ន្ធនឹងការប្រើប្រាស់រូបភាព ឬតួអង្គដែលមានកម្មសិទ្ធិបញ្ញាដោយគ្មានការអនុញ្ញាត។​ កិច្ចព្រមព្រៀងនេះផ្តោតសំខាន់លើម៉ូឌែល AI បង្កើតវីដេអូ Seedance និងម៉ូឌែលបង្កើតរូបភាព Seedream របស់ ByteDance ដែលបច្ចុប្បន្នត្រូវបានដាក់ឱ្យប្រើប្រាស់នៅលើកម្មវិធីល្បីៗដូចជា TikTok, CapCut និង Dreamina។

កាលពីខែកុម្ភៈ កន្លងទៅ សមាគម MPA (រួមមានស្ទូឌីយោធំៗដូចជា Disney, Netflix, និង Sony Pictures) បានផ្ញើលិខិតព្រមានផ្លូវច្បាប់ (Cease-and-Desist) ទៅកាន់ ByteDance។ ក្រុមប្រឹក្សាហូលីវូដបានសម្តែងការព្រួយបារម្ភយ៉ាងខ្លាំងថា ឧបករណ៍ AI ទាំងនេះអាចបង្កើតវីដេអូ ឬរូបភាពដែលយកតួអង្គភាពយន្តល្បីៗ រួមទាំងទម្រង់មុខមាត់របស់តារាសម្តែងមកប្រើប្រាស់ដោយរំលោភសិទ្ធិ។

ByteDance បានបញ្ជាក់ថា នៅក្នុងកំណែអាប់ដេតថ្មីនៃ Seedance និង Seedream ក្រុមហ៊ុនបានបន្ថែមប្រព័ន្ធសុវត្ថិភាព និងការការពារកម្មសិទ្ធិបញ្ញាយ៉ាងរឹងមាំ។ ភាគីទាំងពីរបានព្រមព្រៀងបន្តសហការគ្នាដើម្បីអភិវឌ្ឍប្រព័ន្ធការពារបន្ថែមទៀត នៅពេលដែលបច្ចេកវិទ្យា AI កាន់តែមានភាពរីកចម្រើន៕