(ប៉េកាំង)៖ នៅពេលដែលពិភពលោកកំពុងដេញតាមរលកនៃបច្ចេកវិទ្យា ទីក្រុងប៉េកាំងបានប្រែក្លាយតំបន់អភិវឌ្ឍន៍សេដ្ឋកិច្ច-បច្ចេកវិទ្យា «អ៉ីជួង» ឬ (Yizhuang) ឱ្យទៅជាចលករដ៏មានឥទ្ធិពលបំផុតមួយ ក្នុងការទាញយកបច្ចេកវិទ្យាចុងក្រោយបង្អស់មកបង្កើតជា «កម្លាំងផលិតភាពគុណភាពថ្មី»។

នៅពីថ្ងៃទី១ ខែកក្កដា ឆ្នាំ២០២៦ នៅឯមជ្ឈមណ្ឌលនវានុវត្តន៍វិទ្យាសាស្ត្រ និងបច្ចេកវិទ្យាប៉េកាំង រ៉ូបូតរូបរាងដូចមនុស្សម៉ូឌែល «តៀនកុង ៣.០» ឬ (Tiangong 3.0) បានធ្វើឱ្យមានការចាប់អារម្មណ៍យ៉ាងខ្លាំង តាមរយៈការរាំ និងធ្វើចលនាយ៉ាងរស់រវើកដូចមនុស្សពិតៗ ដែលនេះជាសាក្សីបង្ហាញពីការលោតផ្លោះនៃផ្នែក Hardware និង AI Interactive របស់ចិន។ តំបន់អ៉ីជួង មិនមែនត្រឹមតែជាតំបន់រោងចក្រធម្មតានោះទេ ប៉ុន្តែជាវេទិកាយុទ្ធសាស្ត្រដែលកំពុងស្រូបយកឧស្សាហកម្មស្នូលចំនួន ៣ សំខាន់ៗ រួមមាន៖ រ៉ូបូតរូបរាងដូចមនុស្ស (Humanoid Robots), បច្ចេកវិទ្យាអាកាសចរណ៍ពាណិជ្ជកម្ម (Commercial Aerospace) និង ប្រព័ន្ធបញ្ញាសិប្បនិម្មិតទូទៅ (General AI)។

គួរជម្រាបថា ការផ្លាស់ប្តូរនៅតំបន់អ៉ីជួង ស្ទើរតែបានដោះស្រាយប្រសិទ្ធភាពនៃពាក្យថា «ពីការស្រាវជ្រាវ ទៅជាផលិតផល»។ តាមរយៈការតភ្ជាប់រវាងអ្នកវិទ្យាសាស្ត្រ ក្រុមហ៊ុនបច្ចេកវិទ្យា និងអាជ្ញាធរក្នុងតំបន់ ទីក្រុងប៉េកាំងកំពុងប្រែក្លាយគំនិតច្នៃប្រឌិតនៅលើក្រដាស ឱ្យទៅជាខ្សែសង្វាក់ផលិតកម្មពិតប្រាកដភ្លាមៗ។ ការអភិវឌ្ឍយ៉ាងលឿនដូចផ្លេកបន្ទោរនៃតំបន់អ៉ីជួងនេះ មិនត្រឹមតែជាការវាស់វែងលើសមត្ថភាពបច្ចេកវិទ្យារបស់ចិនប៉ុណ្ណោះទេ ប៉ុន្តែថែមទាំងជាសញ្ញាព្រមានដល់មជ្ឈមណ្ឌលបច្ចេកវិទ្យាធំៗលើពិភពលោកថា «ឧស្សាហកម្មពេលអនាគត» បានចាប់ផ្តើមដំណើរការជាផ្លូវការហើយនៅទីនេះ៕