(បរទេស)៖ បណ្តាញសង្គម Telegram ត្រូវបានគេរាយការណ៍ថា បានដាក់ពាក្យស្នើសុំគ្រប់គ្រងដែនកំពូល (Top-Level Domain) «.gram» នៅក្នុងជុំនៃការដាក់ពាក្យឆ្នាំ២០២៦ របស់អង្គការ ICANN ដែលជាដំណើរការចំណាយដើមទុនរហូតដល់ ២២៧,០០០ដុល្លារ។ ផែនការនេះមានគោលបំណងផ្លាស់ប្តូរឈ្មោះអ្នកប្រើប្រាស់ (Username) របស់មនុស្សជាង ១ពាន់លាននាក់ ឱ្យទៅជាអាសយដ្ឋាន Second-Level Domain ព្រមទាំងអនុញ្ញាតឱ្យប្រព័ន្ធ AI បង្កើតគេហទំព័រផ្ទាល់ខ្លួននៅលើអាសយដ្ឋានទាំងនោះបានភ្លាមៗ។

ទោះជាយ៉ាងណា អ្នកជំនាញបច្ចេកវិទ្យាបានចង្អុលបង្ហាញថា អ្វីដែល Telegram មិនបានគូសបញ្ជាក់ច្បាស់ គឺរចនាសម្ព័ន្ធពិតប្រាកដនៃ Brand TLDs។ ប្រសិនបើ Telegram គ្រប់គ្រងដែន .gram ក្នុងនាមជាប្រតិបត្តិករចុះបញ្ជី (Registry Operator) នោះរាល់អាសយដ្ឋាន username.gram នឹងក្លាយជាត្រឹមតែ «Subdomain» ដែលស្ថិតក្រោមការគ្រប់គ្រងទាំងស្រុងរបស់ Telegram ប៉ុណ្ណោះ។ វាមានលក្ខណៈស្រដៀងទៅនឹងអាសយដ្ឋាន Gmail ដែរ​ ប្រើប្រាស់បានដោយឥតគិតថ្លៃ ប៉ុន្តែក្រុមហ៊ុនមានសិទ្ធិគ្រប់គ្រង និងដកហូតវិញបានគ្រប់ពេល។

លក្ខខណ្ឌនេះខុសប្លែកទាំងស្រុងពី «Domain ផ្ទាល់ខ្លួន» ដែលទិញតាមរយៈ GoDaddy ឬ Namecheap ដែលជាទ្រព្យសម្បត្តិឌីជីថលឯករាជ្យរបស់អ្នកប្រើប្រាស់ អាចផ្ទេរចេញ ការពារតាមផ្លូវច្បាប់ ឬរក្សាទុកបាន ទោះបីជាចាកចេញពីភ្លេតហ្វមដើមក៏ដោយ។

គួរបញ្ជាក់ថា អង្គការ ICANN បានបិទទទួលពាក្យស្នើសុំកាលពីថ្ងៃទី១២ ខែសីហា ឆ្នាំ២០២៦ កន្លងទៅ ដោយមានការដាក់ពាក្យសរុបជាង ១,៦០០។ សាធារណជននឹងបានដឹងច្បាស់ថា តើ Telegram មានឈ្មោះក្នុងបញ្ជីផ្លូវការដែរឬទេ នៅថ្ងៃ «Reveal Day» នាចុងខែតុលា ឆ្នាំ២០២៦។ សម្រាប់ភ្លេតហ្វមយក្សដែលមានអ្នកប្រើប្រាស់សកម្មលើសពី ១ពាន់លាននាក់ ដូចដែលស្ថាបនិក និងនាយកប្រតិបត្តិ (CEO) លោក Pavel Durov បានប្រកាសក្នុងខែមីនា ឆ្នាំ២០២៥ តម្លៃសេវាស្នើសុំមិនមែនជាឧបសគ្គឡើយ ប៉ុន្តែក្រុមហ៊ុនត្រូវប្រឈមមុខនឹងការទទួលខុសត្រូវធំក្នុងការប្រតិបត្តិការប្រព័ន្ធ Registry ទាំងមូលទៅតាមកិច្ចសន្យាបច្ចេកទេសរបស់ ICANN៕