(វ៉ាស៊ីនតោន)៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានរៀបចំជំនួបពិភាក្សាជាមួយថ្នាក់ដឹកនាំ និងនាយកប្រតិបត្តិក្រុមហ៊ុនល្បីៗក្នុងវិស័យរូបិយប័ណ្ណគ្រីបតូនៅសេតវិមាន ដើម្បីជំរុញការអនុម័តច្បាប់ និងបទប្បញ្ញត្តិថ្មីៗសម្រាប់វិស័យទ្រព្យសកម្មឌីជីថល។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃទី២០ ខែសីហា ឆ្នាំ២០២៤។

នៅក្នុងជំនួបនោះ លោក ដូណាល់ ត្រាំ បានអំពាវនាវយ៉ាងទទូចឱ្យសភាអាមេរិកពន្លឿនការអនុម័តច្បាប់ «Clarity Act» ឱ្យបានឆាប់រហ័ស។ លោកបានបញ្ជាក់ថា ច្បាប់នេះនឹងជួយកំណត់និយមន័យច្បាស់លាស់អំពីទ្រព្យសកម្មឌីជីថល និងបង្កើតក្របខ័ណ្ឌច្បាប់ដ៏រឹងមាំមួយសម្រាប់ក្រុមហ៊ុនគ្រីបតូនៅក្នុងប្រទេស។ ជំនួបដ៏សំខាន់នេះ មានការចូលរួមពីសំណាក់នាយកប្រតិបត្តិក្រុមហ៊ុនធំៗដូចជា លោក Brian Armstrong ជានាយកប្រតិបត្តិ Coinbase, លោក Vlad Tenev នាយកប្រតិបត្តិ Robinhood, លោក Arjun Sethi នាយកប្រតិបត្តិ Kraken និងលោក Jeffrey Sprecher នាយកប្រតិបត្តិក្រុមហ៊ុន Intercontinental Exchange ព្រមទាំងមន្ត្រីជាន់ខ្ពស់រដ្ឋាភិបាលជាច្រើនរូបទៀត។

ទន្ទឹមនឹងនេះ គណៈកម្មការមូលបត្រ និងការផ្លាស់ប្តូរអាមេរិក (US SEC) ក្រោមការដឹកនាំរបស់ប្រធានថ្មី លោក Paul Atkins បានស្នើបទប្បញ្ញត្តិថ្មីដែលលើកលែងក្រុមហ៊ុន ឬការបោះផ្សាយថូខិន (Token) មួយចំនួនពីច្បាប់មូលបត្រដ៏តឹងរ៉ឹង។ ការកែសម្រួលនេះមានគោលបំណងសម្រួលដល់ក្រុមហ៊ុនគ្រីបតូ ក្នុងការប្រមូលទុន និងពង្រីកអាជីវកម្មនៅក្នុងសហរដ្ឋអាមេរិក។

ទោះជាយ៉ាងណាក៏ដោយ អ្នកវិភាគ និងនាយកប្រតិបត្តិក្នុងវិស័យនេះបានលើកឡើងថា ទោះបីជាស្ថាប័នប្រកាសបទប្បញ្ញត្តិធូរស្រាលយ៉ាងណាក៏ដោយ មានតែច្បាប់ «Clarity Act» ដែលចេញដោយសភាប៉ុណ្ណោះ ទើបអាចធានាបាននូវស្ថិរភាពផ្លូវច្បាប់រយៈពេលវែង ដោយមិនប្រឈមនឹងការផ្លាស់ប្តូរនៅពេលមានការផ្លាស់ប្តូររដ្ឋាភិបាលនាពេលអនាគត៕