(បរទេស)៖ តម្លៃរូបិយវត្ថុឌីជីថល Bitcoin បានហក់ឡើងលើស ៨០,០០០ ដុល្លារ ដោយបានឈានដល់កម្រិតខ្ពស់បំផុតក្នុងរយៈពេលជាង ៣ ខែចុងក្រោយនេះ។ ការកើនឡើងនេះកើតឡើងបន្ទាប់ពីប្រាក់ដុល្លារអាមេរិកបានចុះខ្សោយ ក្រោយពេលរដ្ឋមន្ត្រីក្រសួងរតនាគារអាមេរិក លោក Scott Bessent បានចេញវិធានការដើម្បីធ្វើឱ្យទីផ្សារប័ណ្ណបំណុលមានស្ថិរភាព ដែលបានជំរុញឱ្យវិស័យរូបិយវត្ថុគ្រីបតូ (Crypto) ទទួលបានសន្ទុះងើបឡើងវិញយ៉ាងខ្លាំង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៥ ខែសីហា​ ឆ្នាំ២០២៦។

ស្របពេលជាមួយគ្នានេះ ការដែលលោកប្រធានាធិបតី ដូណាល់ ត្រាំ បានស្នើឱ្យសភាអនុម័តច្បាប់ផ្ដល់និយមន័យច្បាស់លាស់ដល់វិស័យគ្រីបតូ ក៏បានធ្វើឱ្យ Bitcoin កើនឡើង ១៦% បន្ថែមទៀត។ នៅក្នុងខែសីហានេះ តម្លៃ Bitcoin បានកើនឡើងសរុប ២៨% ហើយ ដែលជាការកើនឡើងប្រចាំខែធំបំផុតមិនធ្លាប់មានគិតចាប់តាំងពីខែវិច្ឆិកា ឆ្នាំ២០២៤ មក ដោយសម្រេចបានកម្រិតកំពូលរហូតដល់ ៨១,២៣៧.៩៤ ដុល្លារ។

ជុំវិញការប្រែប្រួលសេដ្ឋកិច្ចម៉ាក្រូនេះ លោក Tim Sun អ្នកស្រាវជ្រាវជាន់ខ្ពស់នៅ HashKey Group បានលើកឡើងថា៖ «សាររបស់លោក Bessent បានពង្រឹងទស្សនៈទីផ្សារថា អាជ្ញាធរអាមេរិកអាចនឹងមិនអត់ឱនចំពោះការកើនឡើងនៃអត្រាផលប័ត្រប័ណ្ណបំណុលនោះឡើយ ដែលកត្តានេះនឹងបង្កើតបរិបទសេដ្ឋកិច្ចគាំទ្រដល់ទ្រព្យសកម្មដូចជា Bitcoin និងមាស»។ ចំណែកលោក Geoff Kendrick ប្រធានផ្នែកស្រាវជ្រាវទ្រព្យសកម្មឌីជីថលនៅ Standard Chartered ក៏បានគូសបញ្ជាក់ដែរថា ការប្រកាសរបស់ក្រសួងរតនាគារគឺជា «អ្វីដែល Bitcoin ចូលចិត្តបំផុត» ព្រោះវាត្រូវបានបង្កើតឡើងដើម្បីឱ្យវិនិយោគិនចៀសវាងពីការជ្រៀតជ្រែកបែបនេះ។

ផ្អែកលើការព្រួយបារម្ភជុំវិញការធ្លាក់ចុះតម្លៃរូបិយវត្ថុ (Debasement trade) លោក Tony Sycamore អ្នកវិភាគទីផ្សារនៅ IG បានបន្ថែមថា៖ «ការប្រកាសនេះបានជំរុញឱ្យអ្នកទិញប្រញាប់ប្រញាល់ទិញទ្រព្យសកម្មរូបវន្ត និងឌីជីថល។ ប្រសិនបើថ្លៃដេញថ្លៃនៅតែបន្តវាយទម្លុះលើសពីកម្រិតនេះ វានឹងបើកផ្លូវឱ្យ Bitcoin ខិតទៅជិត ៩៥,០០០ ទៅ ១០០,០០០ ដុល្លារ»៕