(បរទេស)៖ ក្រុមហ៊ុនបច្ចេកវិទ្យាយក្ស Apple ត្រូវគេរាយការណ៍ថា បានបង្កើតគំរូសាកល្បង (Prototype) ស្ងាត់ៗ និងបានពិចារណាយ៉ាងម៉ត់ចត់ ក្នុងការប្រកាសចេញប៊ិច Apple Pencil ពិសេសមួយ សម្រាប់ទូរសព្ទ iPhone អេក្រង់បត់ដំបូងបង្អស់របស់ខ្លួន។ នេះបើយោងតាមការទម្លាយព័ត៌មានពីលោក Mark Gurman អ្នកយកព័ត៌មានជាន់ខ្ពស់ផ្នែកបច្ចេកវិទ្យានៃភ្នាក់ងារ Bloomberg នៅក្នុងព្រឹត្តិបត្រព័ត៌មាន Power On នាថ្ងៃទី៣១ ខែសីហា ឆ្នាំ២០២៦។

ប្រភពដដែលបានឱ្យដឹងថា ប៊ិច Apple Pencil គំរូសម្រាប់ iPhone អេក្រង់បត់នេះ ត្រូវបានរចនាឱ្យមានរាងតូចខ្លី (Stubbier) ជាងប៊ិចដែលប្រើលើ iPad ដើម្បីឱ្យងាយស្រួលកាន់ ព្រមទាំងអាចឆក់ភ្ជាប់មេដែក និងសាកថ្មឥតខ្សែលើគែមស្មាតហ្វូនបានយ៉ាងរលូន។ ទោះជាយ៉ាងណា លោក Gurman បានគូសបញ្ជាក់ថា Apple ហាក់មិនទាន់មានផែនការបញ្ចេញគ្រឿងបន្លាស់ (Accessory) មួយនេះជាសាធារណៈនៅឡើយទេ ដោយសារបញ្ហាបច្ចេកទេស និងការរក្សាជំហរដើម។

គួររំឭកថា ការប្រើប៊ិចលើទូរសព្ទដៃ គឺជាប្រធានបទចោទសួរមួយក្នុងប្រវត្តិសាស្ត្រ Apple។ កាលពីឆ្នាំ២០០៧ ស្ថាបនិក Steve Jobs ធ្លាប់បានថ្លែងចំអកយ៉ាងខ្លាំងទៅលើប៊ិច Stylus ស្មាតហ្វូន ក្នុងពេលប្រកាសចេញ iPhone ជំនាន់ដំបូងថា «អ្នកណាទៅត្រូវការប៊ិច Stylus? ត្រូវយកវាចេញ ដើរចោលវា ហើយវង្វេងវាបាត់... គ្មានអ្នកណាចង់បានប៊ិច Stylus ទេ!»។ ប៉ុន្តែក្រោយមក ក្រោមការដឹកនាំរបស់លោក Tim Cook ក្រុមហ៊ុនបានប្រកាសចេញ Apple Pencil សម្រាប់ iPad ក្នុងឆ្នាំ២០១៥ ហើយទទួលបានការគាំទ្រយ៉ាងខ្លាំងពីអ្នកជំនាញឌីហ្សាញ។

ផ្អែកលើប្រភពព័ត៌មានស្និទ្ធនឹងខ្សែសង្វាក់ផលិតកម្ម ក្រុមហ៊ុន Apple ត្រូវបានគេរំពឹងយ៉ាងមុតមាំថានឹងប្រកាសបង្ហាញ iPhone អេក្រង់បត់ដំបូងបង្អស់ ដែលមានឈ្មោះថា iPhone Ultra នៅក្នុងព្រឹត្តិការណ៍ផ្លូវការនាថ្ងៃទី៩ ខែកញ្ញា ខាងមុខនេះ។ ទោះបីជាប៊ិច Apple Pencil អាចនឹងមិនត្រូវ បានដាក់លក់អមជាមួយទូរសព្ទនេះភ្លាមៗក៏ដោយ ប៉ុន្តែការសាកល្បងនេះបង្ហាញថា Apple កំពុងខិតខំកែច្នៃ iPhone Ultra ឱ្យក្លាយជាឧបករណ៍ផលិតភាព (Productivity Device) ដណ្ដើមទីផ្សារពីគូប្រជែង Samsung Galaxy Z Fold ដែលមានប៊ិច S Pen ស្រាប់៕