(បរទេស)៖ ក្រុមហ៊ុនបច្ចេកវិទ្យាយក្ស Apple បានដាក់ភស្តុតាងថ្មីទៅកាន់តុលាការសហព័ន្ធ ដោយបានពិពណ៌នាថាជា «ភស្តុតាងគួរឲ្យភ្ញាក់ផ្អើល» (shocking evidence) ក្នុងការប្តឹងផ្តល់ប្រឆាំងនឹងក្រុមហ៊ុន OpenAI ពាក់ព័ន្ធនឹងការលួចសម្ងាត់ពាណិជ្ជកម្ម និងទិន្នន័យបច្ចេកវិទ្យា។

យោងតាមឯកសារតុលាការដែលបានដាក់កាលពីថ្ងៃចន្ទ ទី៣១ ខែសីហា ឆ្នាំ២០២៦ ក្រុមហ៊ុន Apple បានចោទប្រកាន់អតីតវិស្វករអគ្គិសនីប្រព័ន្ធជាន់ខ្ពស់របស់ខ្លួន គឺលោក Chang Liu (ដែលធ្លាប់ធ្វើការនៅ Apple រយៈពេល ៨ ឆ្នាំ) ថាបានចូលប្រើប្រាស់ និងលួចយកប្លង់សៀគ្វី នៃប្រព័ន្ធបំប្លែងថាមពល ដែលជាបច្ចេកវិទ្យាសម្ងាត់ផ្ទៃក្នុងរបស់ Apple។

ព័ត៌មានលម្អិតនៃភស្តុតាងរួមមាន៖
១៖ ការលួចទិន្នន័យ និងចូលប្រើប្រាស់ Apple បានរកឃើញភស្តុតាងកោសល្យវិច័យឌីជីថលនៅលើកុំព្យូទ័រ Laptop MacBook ដែលបង្ហាញថា លោក Chang Liu បានចូលមើល និងទាញយកឯកសារបច្ចេកវិទ្យាសម្ងាត់ជាច្រើន សូម្បីតែបន្ទាប់ពីលោកបានចាកចេញពី Apple ហើយទៅចូលរួមជាមួយក្រុមហ៊ុន OpenAI (និងផ្នែក hardware រក្សាការសម្ងាត់ io Products) រួចហើយក៏ដោយ។

២៖ ការបំផ្លាញភស្តុតាង ក្រុមហ៊ុន Apple ក៏បានអះអាងបន្ថែមថា បន្ទាប់ពីដឹងខ្លួនថាត្រូវគេស៊ើបអង្កេត លោក Liu បានព្យាយាមលុបបំបាត់ និងបំផ្លាញភស្តុតាងនៃទិន្នន័យដែលបានលួចទាំងនោះ ដើម្បីបិទបាំងសកម្មភាពរបស់ខ្លួន។

សកម្មភាពផ្លូវច្បាប់នេះ គឺជាការបន្ថែមបទចោទយ៉ាងធ្ងន់ធ្ងរនៅក្នុងបណ្តឹងរឿងក្តីក្តាំងសម្ងាត់ពាណិជ្ជកម្មដែល Apple បានដាក់ពាក្យប្តឹង OpenAI កាលពីដើមខែកក្កដា ឆ្នាំ២០២៦ កន្លងទៅ។ ជម្លោះផ្លូវច្បាប់នេះកាន់តែមានកម្ដៅខ្លាំង ខណៈដែលក្រុមហ៊ុនទាំងពីរកំពុងប្រកួតប្រជែងគ្នាយ៉ាងស្រួចស្រាវលើការអភិវឌ្ឍឧបករណ៍បច្ចេកវិទ្យា AI ជំនាន់ក្រោយ។

តំណាងក្រុមហ៊ុន OpenAI ធ្លាប់បានឆ្លើយតបប្រឆាំងនឹងការចោទប្រកាន់នាពេលកន្លងមក ដោយទម្លាក់កំហុសលើប្រព័ន្ធសុវត្ថិភាពរបស់ Apple ថាមានចន្លោះប្រហោង។ ទោះជាយ៉ាងណាក៏ដោយ ការទម្លាយភស្តុតាងថ្មីចុងក្រោយពីសំណាក់ Apple ត្រូវបានគេមើលឃើញថា នឹងធ្វើឱ្យ OpenAI ប្រឈមមុខនឹងសម្ពាធផ្លូវច្បាប់កាន់តែខ្លាំងនៅក្នុងតុលាការ៕