(ស៊េអ៊ូល)៖ ប្រទេសកូរ៉េខាងត្បូង និងសហរដ្ឋអាមេរិក កំពុងបន្តការពិភាក្សាលើការវិនិយោគលើវិស័យបន្ទះឈីប (Semiconductors) នៅក្នុងដែនដីអាមេរិក ដែលជាផ្នែកមួយនៃការចរចាទ្វេភាគីកាន់តែទូលំទូលាយ។ នេះបើយោងតាមការថ្លែងរបស់មន្ត្រីជាន់ខ្ពស់នៃវិមានប្រធានាធិបតីកូរ៉េខាងត្បូង (Blue House) ទៅកាន់អ្នកសារព័ត៌មាននៅថ្ងៃសុក្រសប្តាហ៍នេះ។

ការចេញមុខបញ្ជាក់នេះ ធ្វើឡើងបន្ទាប់ពីមានសំណួរចោទសួរថា តើគម្រោងដំឡើងពន្ធលើការនាំចូលបន្ទះឈីប ដែលលើកឡើងដោយរដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick កំពុងជះឥទ្ធិពលដល់ការចរចាវិនិយោគរវាងប្រទេសទាំងពីរដែរឬទេ។ មន្ត្រីរូបនោះបានបញ្ជាក់ថា «មានបញ្ហាប្រឈមជាច្រើនរវាងកូរ៉េខាងត្បូង និងសហរដ្ឋអាមេរិក ហើយជួនកាលបញ្ហាទាំងនោះអាចជះឥទ្ធិពលដាក់គ្នាទៅវិញទៅមក» ដោយលោកបានបន្ថែមថា វិស័យបន្ទះឈីបគឺជាផ្នែកមួយនៃកិច្ចការវិនិយោគដែលកំពុងស្ថិតក្រោមការពិភាក្សា ហើយរដ្ឋាភិបាលទីក្រុងស៊េអ៊ូលកំពុងខិតខំប្រឹងប្រែងដើម្បីកុំឱ្យបញ្ហាទាំងនេះក្លាយជាឧបសគ្គរវាងគ្នានិងគ្នា។

កាលពីដើមសប្តាហ៍នេះ រដ្ឋមន្ត្រីពាណិជ្ជកម្មអាមេរិក លោក Howard Lutnick បានថ្លែងថា វ៉ាស៊ីនតោនកំពុងរៀបចំ «គោលនយោបាយពន្ធដារលើការនាំចូលបន្ទះឈីប» យ៉ាងជាក់លាក់មួយ។ លោកបានបញ្ជាក់នៅក្នុងបទសម្ភាសន៍តាមទូរទស្សន៍ថា «ប្រសិនបើអ្នកមិនមកបង្កើតរោងចក្រផលិតនៅទីនេះទេ សូមត្រៀមខ្លួនបង់ពន្ធដើម្បីចូលមកកាន់ទីផ្សារដ៏ធំបំផុតនៅក្នុងពិភពលោកមួយនេះ»។ ផ្អែកតាមកិច្ចព្រមព្រៀងកាលពីឆ្នាំមុន ដែលរួមមានការសន្យាវិនិយោគទំហំ ៣៥០ ពាន់លានដុល្លារពីសំណាក់កូរ៉េខាងត្បូង លើផ្នែកផលិតកម្មនៅអាមេរិក ក្រុមហ៊ុនផលិតបន្ទះឈីបកូរ៉េខាងត្បូងនឹងទទួលបានអត្រាពន្ធ «មិនតិចជាង ឬមានអត្ថប្រយោជន៍ស្មើ» ទៅនឹងលក្ខខណ្ឌដែលផ្តល់ឱ្យគូប្រជែងផ្សេងទៀតដែលមានទំហំពាណិជ្ជកម្មឈីបស្មើគ្នា ឬធំជាង។

គួររំលឹកផងដែរថា ប្រទេសកូរ៉េខាងត្បូងគឺជាទីតាំងឈរជើងរបស់ក្រុមហ៊ុន Samsung Electronics និង SK Hynix ដែលជាក្រុមហ៊ុនផលិតបន្ទះឈីបចងចាំ (Memory Chips) ធំជាងគេបំផុតនៅលើពិភពលោក។ តម្រូវការបន្ទះឈីបទាំងនេះបានកើនឡើងយ៉ាងខ្លាំង ខណៈពេលដែលក្រុមហ៊ុនបច្ចេកវិទ្យាយក្សរបស់អាមេរិកកំពុងប្រជែងគ្នាកសាងហេដ្ឋារចនាសម្ព័ន្ធបញ្ញាសិប្បនិម្មិត (AI)។ ទន្ទឹមនឹងនេះ មន្ត្រីដដែលក៏បានបន្តថា ការចរចារវាងទីក្រុងស៊េអ៊ូល និងវ៉ាស៊ីនតោនលើបញ្ហាសន្តិសុខជាតិ មិនទាន់មានសម្រេចបានសញ្ញាណវិជ្ជមាននៅឡើយទេ ជាពិសេសពាក់ព័ន្ធនឹងផែនការរបស់កូរ៉េខាងត្បូងក្នុងការកសាងនាវាមុជទឹកដើរដោយថាមពលនុយក្លេអ៊ែរផ្ទាល់ខ្លួន ដែលជាផ្នែកមួយនៃកិច្ចព្រមព្រៀងកាលពីឆ្នាំមុនផងដែរ៕