(បរទេស)៖ ឧស្សាហកម្មបច្ចេកវិទ្យាសកលកំពុងឈានចូលដល់របត់ផ្លាស់ប្តូរដ៏សំខាន់មួយ ដោយក្រុមហ៊ុនយក្ស Apple បានប្រកាសផ្លាស់ប្តូរថ្នាក់ដឹកនាំកំពូល ស្របពេលដែលក្រុមហ៊ុន Nvidia កំពុងពង្រីកឥទ្ធិពលយ៉ាងខ្លាំងក្លាក្នុងវិស័យបញ្ញាសិប្បនិម្មិត (AI)។ លោក Tim Cook បានលាលែងពីតំណែងជានាយកប្រតិបត្តិ (CEO) របស់ក្រុមហ៊ុន Apple ដោយផ្ទេរតំណែងនេះទៅឱ្យលោក John Ternus ដែលជាអតីតប្រធានផ្នែកផ្នែករឹង (Hardware) របស់ក្រុមហ៊ុន។ ទោះជាយ៉ាងណាក៏ដោយ លោក Tim Cook នឹងមិនចាកចេញពីក្រុមហ៊ុនទាំងស្រុងនោះទេ ដោយលោកនឹងបន្តកាន់តំណែងជាប្រធានប្រតិបត្តិ (Executive Chairman) ដើម្បីផ្តោតលើគោលនយោបាយក្រុមហ៊ុន និងទំនាក់ទំនងខាងក្រៅ។

លោក John Ternus ចូលកាន់តំណែងក្នុងកំឡុងពេលដ៏សំខាន់បំផុតមួយ ដោយលោកបានផ្ញើសារលិខិតដំបូងទៅកាន់បុគ្គលិកដោយប្តេជ្ញាថា នឹងមាន «ការប្រកាសចេញផលិតផលដ៏ធំសម្បើមនាពេលឆាប់ៗខាងមុខនេះ» ដែលត្រូវបានគេរំពឹងថានឹងជារបត់នៃការផ្លាស់ប្តូរថ្មី។ យុគសម័យរបស់លោក Ternus នឹងត្រូវប្រឈមមុខនឹងការផ្លាស់ប្តូរយុទ្ធសាស្ត្រពីការផ្តោតលើ Hardware បែរមកពង្រឹងការអភិវឌ្ឍផ្នែកសូហ្វវែរ និងការបញ្ចូលបច្ចេកវិទ្យា AI ទៅក្នុងប្រព័ន្ធអេកូឡូស៊ីរបស់ Apple។ ស្របពេលជាមួយគ្នានេះដែរ ក្រុមហ៊ុន Nvidia កំពុងបន្តពង្រីកវិសាលភាពរបស់ខ្លួនពីក្រុមហ៊ុនផលិតឈីបពាក់កណ្តាលសម្រេច ទៅជាអ្នកផ្តល់ហេដ្ឋារចនាសម្ព័ន្ធ AI ពេញលេញ (Full AI Stack)។ Nvidia បានធ្វើសកម្មភាពយុទ្ធសាស្ត្រជាច្រើន រួមទាំងការទិញយកក្រុមហ៊ុន Hugging Face និងការវិនិយោគលើក្រុមហ៊ុន MediaTek ព្រមទាំងការបង្កើតដៃគូគណនាធំៗជាច្រើនទៀត។
ទង្វើនេះបង្ហាញពីបំណងច្បាស់លាស់របស់ Nvidia ក្នុងការគ្រប់គ្រងបច្ចេកវិទ្យា AI ចាប់តាំងពីម៉ូឌែលគ្រឹះ រហូតដល់កម្មវិធីប្រើប្រាស់ចុងក្រោយ ដែលបង្កើតជាការប្រកួតប្រជែងយ៉ាងស្រួចស្រាល់ក្នុងទីផ្សារ Cloud និងការអភិវឌ្ឍ AI សកល។

គួរជម្រាបថា ការផ្លាស់ប្តូរក្នុងវិស័យបច្ចេកវិទ្យា ការផ្លាស់ប្តូរថ្នាក់ដឹកនាំរបស់ Apple និងការទន្ទ្រានទីផ្សាររបស់ Nvidia សុទ្ធតែស្តែងឱ្យឃើញពីនិន្នាការរួមនៃឧស្សាហកម្មបច្ចេកវិទ្យាក្នុងយុគសម័យថ្មី និងការបោះទុនយ៉ាងសន្ធឹកសន្ធាប់លើហេដ្ឋារចនាសម្ព័ន្ធ AI ដើម្បីគ្របដណ្តប់ទីផ្សារនាពេលអនាគត៕