(បរទេស)៖ ប្រទេសអូស្ត្រាលីបានស្នើច្បាប់ថ្មីមួយដែលតម្រូវឱ្យក្រុមហ៊ុនប្រព័ន្ធផ្សព្វផ្សាយសង្គម ផ្តល់ជម្រើសដល់អ្នកប្រើប្រាស់ក្នុងការកំណត់មាតិកាដែលពួកគេចង់ឃើញនៅលើទំព័របណ្តាញ (feed) របស់ខ្លួន។ ក្រោមគំនិតផ្តួចផ្តើម «My Feed, My Way» អ្នកប្រើប្រាស់អាចជ្រើសរើសមើលមាតិកាដែលណែនាំដោយ Algorithm ឬបិទវាចោល ហើយជ្រើសរើសមើលតែការបង្ហោះចេញពីមិត្តភក្តិ និងអ្នកបង្កើតមាតិកា (creators) ដែលពួកគេបាន follow ប៉ុណ្ណោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មា​ន Reuters នៅថ្ងៃទី០៨​ ខែកញ្ញា ឆ្នាំ២០២៦។

វិធានការនេះធ្វើឡើងដើម្បីដោះស្រាយក្តីបារម្ភជុំវិញ Algorithm ដែលត្រូវបានរចនាឡើងដើម្បីអូសទាញ និងបង្កើតទម្លាប់ញៀនដល់អ្នកប្រើប្រាស់។ នាយករដ្ឋមន្ត្រីអូស្ត្រាលី លោក Anthony Albanese បានថ្លែងប្រាប់ក្រុមអ្នកកាសែតថា «នេះគឺជាកំណែទម្រង់បែបសមហេតុផល ការអនុវត្តជាក់ស្តែង និងមានប្រយោជន៍»។ លោកបានបន្ថែមទៀតថា «វាផ្តល់ជម្រើសដល់អ្នកប្រើប្រាស់ ហើយវានឹងតម្រូវឱ្យក្រុមហ៊ុនបច្ចេកវិទ្យាយក្សទទួលខុសត្រូវចំពោះអសកម្មភាពរបស់ពួកគេ ប្រសិនបើពួកគេមិនគោរពតាមច្បាប់របស់យើង»។

ប្រសិនបើក្រុមហ៊ុនបច្ចេកវិទ្យាយក្សមិនអនុវត្តតាមច្បាប់នេះទេ ពួកគេអាចប្រឈមមុខនឹងការពិន័យជាប្រាក់រហូតដល់ ១០៩.២ លានដុល្លារអូស្ត្រាលី (ប្រមាណ ៧៩ លានដុល្លារ) ហើយអាជ្ញាធរត្រួតពិនិត្យអ៊ីនធឺណិត (eSafety) នឹងទទួលបានអំណាចក្នុងការបង្ខំឱ្យក្រុមហ៊ុនលុបមាតិកាគ្រោះថ្នាក់ និងខុសច្បាប់ចេញជាបន្ទាន់។ ទោះជាមានការព្រមានពីអ្នកការពារសេរីភាពក្នុងការបញ្ចេញមតិអំពីការត្រួតពិនិត្យមាតិកា (censorship) ក៏ដោយ លោក Albanese បានគូសបញ្ជាក់យ៉ាងច្បាស់ថា «វាមិនមែនជាការផ្តល់ការត្រួតពិនិត្យដល់រដ្ឋាភិបាលនោះទេ។ វាគឺអំពីការផ្តល់ការត្រួតពិនិត្យ និងសិទ្ធិអំណាចទៅឱ្យប្រជាជនវិញ»។

គូសបញ្ជាក់ថា រដ្ឋាភិបាលអូស្ត្រាលីគ្រោងនឹងដាក់សេចក្តីព្រាងច្បាប់នេះជូនសភានៅចុងឆ្នាំនេះ បន្ទាប់ពីទទួលបានមតិយោបល់ត្រឡប់ពីភាគីពាក់ព័ន្ធ និងស្ថាប័នស៊ីវិល។ ការផ្លាស់ប្តូរនេះ បានធ្វើឱ្យអូស្ត្រាលីដើរតាមគន្លងរបស់សហភាពអឺរ៉ុប ក្នុងការបន្តរឹតបន្តឹង និងទាមទារឱ្យក្រុមហ៊ុន Big Tech ទទួលខុសត្រូវខ្ពស់ចំពោះសុវត្ថិភាពរបស់អ្នកប្រើប្រាស់អនឡាញ៕