(បរទេស)៖ ក្រុមហ៊ុនយក្ស Amazon បានសម្រេចចិត្តផ្អាកកិច្ចប្រតិបត្តិការទាំងអស់ជាបណ្ដោះអាសន្នជាមួយក្រុមហ៊ុនអាកាសចរណ៍ 21 Air ដែលមានមូលដ្ឋាននៅទីក្រុងម៉ាមី (Miami) បន្ទាប់ពីមានហេតុការណ៍គ្រោះថ្នាក់ដ៏រន្ធត់នៃការធ្លាក់យន្តហោះដឹកទំនិញបំពាក់ស្លាកសញ្ញា Amazon ដែលបានបណ្ដាលឱ្យមនុស្សស្លាប់ចំនួន ៥នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៤ ខែកញ្ញា ឆ្នាំ២០២៦។

អ្នកនាំពាក្យក្រុមហ៊ុន Amazon លោកស្រី Kelly Nantel បានថ្លែងក្នុងសេចក្តីប្រកាសព័ត៌មានថា៖ «បន្ទាប់ពីហេតុការណ៍ដ៏រន្ធត់កាលពីចុងសប្ដាហ៍មុន យើងបានចំណាយពេលគាំទ្រដល់ការស៊ើបអង្កេត និងពិនិត្យមើលស្ថានភាពជុំវិញមួយចំនួន ហើយយើងបានសម្រេចចិត្តផ្អាកកិច្ចប្រតិបត្តិការរបស់យើងជាមួយក្រុមហ៊ុន 21 Air ដែលជាអ្នកប្រតិបត្តិការជើងហោះហើរលេខ 7598»។ លោកស្រីបានបន្ថែមថា ក្រុមហ៊ុននឹងបន្តផ្ដល់កិច្ចសហការពេញលេញដើម្បីជួយដល់ការស៊ើបអង្កេត និងអ្នកដែលរងផលប៉ះពាល់ទាំងអស់។

យោងតាមរបាយការណ៍បឋម ជើងហោះហើរដឹកទំនិញ Prime Air លេខ 7598 ដែលប្រើប្រាស់យន្តហោះប្រភេទ Boeing 767-300 មានអាយុកាល ៣២ឆ្នាំ បានបោះពួយហួសផ្លូវរត់នៅអាកាសយានដ្ឋានអន្តរជាតិទីក្រុងម៉ាមី និងបានធ្លាក់បុកយានយន្តនៅលើដី។ គណៈកម្មាធិការសុវត្ថិភាពដឹកជញ្ជូនជាតិអាមេរិក (NTSB) បានរកឃើញភស្តុតាងពីប្រអប់ខ្មៅបង្ហាញថា អាកាសយានិកបានព្រមានគ្នាថាពួកគេហោះហើរ «លឿនពេក» មុនពេលចុះចត និងធ្លាប់បានពិចារណាលើការបោះបង់ចោលការចុះចតផងដែរ។

ទោះជាយ៉ាងណា ក្រុមហ៊ុនអាកាសចរណ៍ 21 Air បានចេញសេចក្តីថ្លែងការណ៍បញ្ជាក់ពីជំហររបស់ខ្លួនថា៖ «ពួកយើងនៅតែផ្ដោតសំខាន់លើការគាំទ្រដល់ក្រុមគ្រួសារ និងមនុស្សជាទីស្រឡាញ់ដែលរងផលប៉ះពាល់ដោយសារគ្រោះថ្នាក់នេះ ព្រមទាំងធ្វើការយ៉ាងជិតស្និទ្ធជាមួយស្ថាប័ន NTSB និងដៃគូទាំងអស់របស់យើង ដូចជាក្រុមហ៊ុន Amazon ស្របពេលដែលការស៊ើបអង្កេតនៅតែបន្ត។ យើងមានទំនុកចិត្តយ៉ាងខ្លាំងលើគោលនយោបាយ នីតិវិធី និងការបណ្តុះបណ្តាលសុវត្ថិភាពរបស់យើង»៕