(បេកាំង)៖ លោក Chen Yixin ប្រធានក្រសួងសន្តិសុខរដ្ឋចិន (MSS) បានចេញផ្សាយអត្ថបទព្រមានជាប្រវត្តិសាស្ត្រមួយលើទស្សនាវដ្តីរដ្ឋ China Cyberspace ដោយគូសបញ្ជាក់ថា បច្ចេកវិទ្យាបញ្ញាសិប្បនិម្មិត (AI) អាចក្លាយជាឧបករណ៍គំរាមកំហែងផ្ទាល់ដល់ការក្តោបក្តាប់អំណាចរបស់បក្សកុម្មុយនីស្តចិន (CCP) និងស្ថិរភាពសន្តិសុខជាតិ។

ការវាយតម្លៃដោយត្រង់ៗនេះបង្ហាញពីភាពខុសគ្នាយ៉ាងខ្លាំងរវាងកង្វល់របស់ចិន (ផ្តោតលើសន្តិសុខនយោបាយ និងរបបដឹកនាំ) និងសហរដ្ឋអាមេរិក (ដែលភាគច្រើនផ្តោតលើការបាត់បង់ការគ្របដណ្តប់លើ AI ឬគ្រោះថ្នាក់ដល់មនុស្សជាតិ)។

លោក Chen Yixin បានរៀបរាប់ពីហានិភ័យធំៗដែល AI អាចបង្ករឿងដល់ប្រទេសចិន រួមមាន៖
- ការបំផ្លាញសន្តិសុខនយោបាយ និងអំណាចបក្ស៖ ក្រុមដែលមានបំណងមិនល្អអាចប្រើប្រាស់ Generative AI ដើម្បីបង្កើតវីដេអូ ឬសំឡេងក្លែងក្លាយ កម្រិតខ្ពស់ ដើម្បីធ្វើសង្គ្រាមព័ត៌មាន ឬបង្កើតព័ត៌មានបំពុលដែលធ្វើឱ្យមានភាពវឹកវរក្នុងសង្គម។

- ការវាយប្រហារលើហេដ្ឋារចនាសម្ព័ន្ធសំខាន់ៗ៖ បច្ចេកវិទ្យា AI ធ្វើឱ្យរបាំងបច្ចេកទេស និងចំណាយនៃការវាយប្រហារសាយប័រកាន់តែទាប។ លោកបានលើកឡើងច្បាស់ៗពីម៉ូឌែល AI របស់អាមេរិក ដូចជា Claude Mythos និង GPT-5.5-Cyber ថាជាគំរូនៃសមត្ថភាព AI ក្នុងការស្វែងរកចន្លោះប្រហោងប្រព័ន្ធ និងបង្កើតកូដវាយប្រហារ Malware ដែលអាចគំរាមកំហែងដល់បណ្តាញព័ត៌មានជាតិ។

- ការលេចធ្លាយទិន្នន័យសម្ងាត់ជាតិ៖ ការប្រើប្រាស់ម៉ូឌែល AI របស់បរទេសដោយអ្នកប្រើប្រាស់ចិន អាចបណ្តាលឱ្យជ្រាបសាយទិន្នន័យយោធា និងព័ត៌មានសម្ងាត់របស់ក្រុមហ៊ុនបច្ចេកវិទ្យាចិនទៅខាងក្រៅ។

ការប្រកួតប្រជែងយោធាកាន់តែស្រួចស្រាវ៖ លោក Chen បានចង្អុលបង្ហាញពីការប្រើប្រាស់ AI ក្នុងជម្លោះយោធារវាងអាមេរិក-អ៊ីស្រាអែល និងអ៊ីរ៉ង់ ថាជាឧទាហរណ៍នៃសមរភូមិទំនើប ហើយប្រទេសណាដែលម្ចាស់ការលើ Algorithm និងប្រព័ន្ធតម្រង់ទិសដៅ AI នឹងទទួលបានប្រៀបលើសមរភូមិ។

ការចេញមុខព្រមានពីស្ថាប័នចារកម្មដ៏មានអំណាចរបស់ចិន ធ្វើឡើងមុនពេលជំនួបកំពូលរវាងប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៊ី ជិនពីង នាថ្ងៃទី២៤ ខែកញ្ញា ឆ្នាំ២០២៦ នៅវ៉ាស៊ីនតោន។

លោក Henry Gao សាស្ត្រាចារ្យច្បាប់នៅសាកលវិទ្យាល័យ Singapore Management University បានកត់សម្គាល់ថា ចិនកំពុងមើលឃើញសុវត្ថិភាព AI តាមរយៈ «កញ្ចក់នៃគូប្រជែង» មិនមែនជាបេសកកម្មមនុស្សធម៌រួមគ្នានោះទេ ដោយបេកាំងបានគូសខ្សែបន្ទាត់ក្រហមយ៉ាងច្បាស់ថា «អធិបតេយ្យភាពទិន្នន័យ និងសន្តិសុខនយោបាយ នឹងមិនត្រូវយកទៅដោះដូរជាមួយកិច្ចព្រមព្រៀងសុវត្ថិភាពអន្តរជាតិនោះឡើយ»៕