(បរទេស)៖ ខ្សែបម្រើ Philippe Coutinho បានចូលរួមលេងជាមួយមិត្តជិតស្និទ្ធ Neymar និងជម្រើសជាតិសាំបាប្រេស៊ីល ក្នុងក្លិប Santos FC ជាមួយគ្នារហូតដល់ចប់រដូវកាលឆ្នាំ២០២៦-២៧។ នេះបើយោងតាមការចេញផ្សាយដោយ BBC។

អតីតកីឡាករក្លិបអង់គ្លេស Liverpool និង FC Barcelona របស់អេស្ប៉ាញ វ័យ ៣៤ឆ្នាំរូបនេះ ពុំមានក្លិបលេងឡើយ ក្រោយចាកចេញពីក្លិបកុមារភាពរបស់លោក Vasco da Gama កាលពីអំឡុងខែកុម្ភៈ ឆ្នាំ២០២៦ មក បន្ទាប់ពីវិលមករួមក្រុមក្នុងឆ្នាំ២០២៤ ដោយចូលលេងសរុបបាន ៨១ប្រកួតផងដែរ។

Santos បានធ្វើការស្វាគមន៍ Coutinho និងបានបង្ហោះរូបចាស់ជាមួយ Neymar កាលនៅយុវជននៅលើបណ្តាញសង្គម។

នៅចាំបានថា Coutinho បានក្លាយជាកីឡាករបាល់ទាត់អាជីពពីក្លិប Vasco មុនពេលផ្លាស់ចេញទៅចូលរួមជាមួយ Inter Milan និងក្រោយមកផ្ទេរទៅ Liverpool កាលឆ្នាំ២០១៣ ជាទីដែលរូបគេស៊ុតបាន ៥៤គ្រាប់ ក្នុងចំណោម ២០១ប្រកួត មុនពេលផ្លាស់ចេញទៅ Barcelona ក្នុងឆ្នាំ២០១៨ ក្នុងតម្លៃខ្លួន ១៤២លានផោន៕