(បរទេស)៖ យោងតាមការលើកឡើងពីអ្នកវិភាគឧស្សាហកម្មបច្ចេកវិទ្យាបានឱ្យដឹងថា ស្មាតហ្វូនអេក្រង់បត់បានដំបូងបង្អស់របស់ក្រុមហ៊ុន Apple ដែលត្រូវបានគេរំកិលឈ្មោះថា iPhone Duo អាចនឹងមានភាពលំបាកខ្លាំងក្នុងការទិញ នៅពេលបញ្ចេញលក់ជាផ្លូវការនាចុងឆ្នាំ២០២៦ នេះ ដោយសារតែបញ្ហាប្រឈមក្នុងសង្វាក់ផ្គត់ផ្គង់ និងសមត្ថភាពផលិតនៅមានកម្រិត។

ក្រុមហ៊ុន Apple កំពុងជួបប្រទះការលំបាកផ្នែកបច្ចេកទេស ក្នុងការផលិតអេក្រង់បត់ និងប្រព័ន្ធគន្លឹះ ឱ្យបានទាន់ពេលវេលា និងឆ្លងផុតស្តង់ដារគុណភាពដ៏តឹងរ៉ឹងរបស់ខ្លួន ដែលធ្វើឱ្យចំនួនផលិតផលសម្រេចដើមដំបូងមានកម្រិតទាប។ ទោះបីជាតម្លៃអាចនឹងខ្ពស់ក៏ដោយ ប៉ុន្តែតម្រូវការពីសំណាក់អ្នកគាំទ្រ Apple និងអ្នកចង់សាកល្បងបច្ចេកវិទ្យាថ្មី ត្រូវបានរំពឹងថានឹងមានទំហំធំធេង ដែលអាចធ្វើឱ្យស្តុកទំនិញលក់ដាច់អស់ ក្នុងរយៈពេលយ៉ាងខ្លីបន្ទាប់ពីបើកឱ្យកក់ទុក (Pre-order)។

អ្នកវិភាគបានព្រមានថា អ្នកដែលមិនបានបញ្ជាទិញភ្លាមៗនៅថ្ងៃដំបូង អាចនឹងត្រូវរង់ចាំការដឹកជញ្ជូនរហូតដល់ជាច្រើនសប្តាហ៍ ឬជាច្រើនខែ៕