(បរទេស)៖ ប្រទេសចិនកំពុងជំរុញការប្រើប្រាស់បញ្ញាសិប្បនិម្មិត (AI) ក្នុងវិស័យភាពយន្ត ដោយរដ្ឋាភិបាលទីក្រុង និងតំបន់ឧស្សាហកម្មជាច្រើនផ្តល់ការឧបត្ថម្ភ កន្លែងធ្វើការ និងធនធានកុំព្យូទ័រ ដើម្បីទាក់ទាញអ្នកផលិតភាពយន្ត និងក្រុមហ៊ុន AI។ លោក Zhu Zhili អ្នកផលិតភាពយន្ត AI នៅទីក្រុងសិនជិន បាននិយាយថា លោកទទួលការទាក់ទងពីទីក្រុងធំៗ និងតំបន់តូចៗជាច្រើនជារៀងរាល់ថ្ងៃ ដោយពួកគេចង់ឱ្យលោកយកអាជីវកម្ម ឬបច្ចេកវិទ្យាទៅបង្កើតនៅទីនោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃទី២៥ ខែកញ្ញា ឆ្នាំ២០២៦។

ការកាត់បន្ថយថ្លៃផលិត គឺជាកត្តាសំខាន់ដែលកំពុងទាក់ទាញអ្នកផលិតឱ្យងាកមកប្រើ AI។ យោងតាមស្ថានីយទូរទស្សន៍រដ្ឋ CCTV ក្នុងឆមាសទី១ឆ្នាំ២០២៦ ថ្លៃផលិតរឿងខ្លីដោយ AI បានធ្លាក់ពីប្រមាណ ៥,០០០យ័នក្នុងមួយនាទី មកនៅត្រឹមប៉ុន្មានរយយ័ន។ លោក Pan Xiaojun និស្សិតថ្នាក់ក្រោយបរិញ្ញាបត្រផ្នែកដឹកនាំភាពយន្ត បាននិយាយថា៖ «ឈុតអាពាហ៍ពិពាហ៍ធម្មតាមួយ អាចចំណាយអស់ ៦០,០០០យ័ន ប្រសិនបើថតតាមរបៀបធម្មតា។ ប៉ុន្តែជាមួយ AI ខ្ញុំអាចធ្វើឱ្យឈុតដ៏អស្ចារ្យដូចគ្នានោះក្លាយជាការពិត ដោយចំណាយត្រឹមតែ ១,៤០០យ័ន»។ ទីក្រុងសៀងហៃ ប៉េកាំង និងសិនជិន ក៏បានដាក់ចេញវិធានការគាំទ្រផ្សេងៗ ដើម្បីកាត់បន្ថយថ្លៃដើម និងពន្លឿនការផលិតមាតិកា AI។

ទោះជាយ៉ាងណា ការផលិតដែលកើនឡើងយ៉ាងលឿនក៏បង្កការព្រួយបារម្ភអំពីការផ្គត់ផ្គង់លើសតម្រូវការ និងការប្រកួតប្រជែងដណ្តើមអ្នកទស្សនា។ ទិន្នន័យរបស់ DataEye បង្ហាញថា ក្នុងឆមាសទី១ឆ្នាំនេះ មានរឿង និងកម្មវិធី AI ថ្មីប្រមាណ ២២១,៩០០ ត្រូវបានដាក់ឱ្យដំណើរការនៅលើ Douyin ប៉ុន្តែមានតែ ១,០៥៥ ប៉ុណ្ណោះដែលទទួលបានការទស្សនាលើស ១០០លានដង។ ទន្ទឹមនឹងនេះ តារាសម្តែងបានលើកឡើងពីការព្រួយបារម្ភចំពោះការយករូបរាង និងសំឡេងរបស់ពួកគេទៅប្រើក្នុងមាតិកា AI ខណៈអ្នកប្រើប្រាស់មួយចំនួនរិះគន់ការលួចចម្លង និងការខ្វះភាពច្នៃប្រឌិត។

គួរជម្រាបថា ចិនតម្រូវឱ្យមានការដាក់ស្លាកបញ្ជាក់មាតិកាដែលបង្កើតដោយ AI ប៉ុន្តែមិនទាន់មានបទប្បញ្ញត្តិច្បាស់លាស់ស្តីពីកម្មសិទ្ធិបញ្ញាសម្រាប់មាតិកាប្រភេទនេះនៅឡើយ។ ទោះជាយ៉ាងណា ភាពយន្ត AI របស់ចិនកំពុងចាប់ផ្តើមឈានទៅទីផ្សារអន្តរជាតិ។ អ្នកដឹកនាំរឿង Cao Yiwen ដែលបានបញ្ចាំងភាពយន្តគំនូរជីវចល AI របស់ខ្លួននៅមហោស្រពភាពយន្ត AI ពិភពលោកនៅទីក្រុង Cannes បាននិយាយថា៖ «បារាំង និងអឺរ៉ុបនៅតែរង់ចាំមើលថា តើចិននឹងដាក់ចេញច្បាប់ច្បាស់លាស់ឬយ៉ាងណា។ យើងបានដើរយឺតជាងគេក្នុងបដិវត្តន៍ឧស្សាហកម្មពីរលើកដំបូង ដូច្នេះប្រហែលជានេះអាចជាបដិវត្តន៍ឧស្សាហកម្មលើកទី៣»៕