(បរទេស)៖ ក្រុមហ៊ុនបច្ចេកវិទ្យាយក្ស Google កំពុងធ្វើតេស្តសាកល្បងមុខងារថ្មីមួយ ដែលអនុញ្ញាតឱ្យអ្នកប្រើប្រាស់នៅក្នុងប្រទេសឥណ្ឌា អាចធ្វើការបញ្ជាទិញទំនិញដោយផ្ទាល់ពីវេទិកាពាណិជ្ជកម្មអេឡិចត្រូនិក Flipkart ដែលជាកម្មសិទ្ធិរបស់ក្រុមហ៊ុន Walmart តាមរយៈជំនួយការបញ្ញាសិប្បនិម្មិត (AI) Gemini និងមុខងារ AI Mode របស់ខ្លួន។

យោងតាមប្រភពព័ត៌មានបានឱ្យដឹងថា ការសាកល្បងនេះ គឺជាផ្នែកមួយនៃកិច្ចខិតខំប្រឹងប្រែងរបស់ Google ក្នុងការបញ្ចូលមុខងារពាណិជ្ជកម្ម (Commerce) ទៅក្នុងប្រព័ន្ធ AI របស់ខ្លួន ដើម្បីឱ្យអ្នកប្រើប្រាស់អាចស្វែងរក និងទិញទំនិញបានយ៉ាងងាយស្រួលដោយមិនបាច់ចាកចេញពីចំណុចប្រទាក់នៃកម្មវិធី AI នោះឡើយ។ តាមរយៈការសហការជាមួយ Flipkart ដែលជាវេទិកាអនឡាញដ៏ធំបំផុតមួយក្នុងប្រទេសឥណ្ឌា Google រំពឹងថានឹងអាចផ្តល់នូវបទពិសោធន៍ទិញទំនិញបែបឆ្លាតវៃ និងលឿនជាងមុនដល់អតិថិជន។

អ្នកជំនាញបច្ចេកវិទ្យាបានមើលឃើញថា ជំហាននេះឆ្លុះបញ្ចាំងពីនិន្នាការសកលដែលក្រុមហ៊ុនបច្ចេកវិទ្យាយក្សនានា កំពុងប្រែក្លាយបញ្ញាសិប្បនិម្មិត (AI Agents) ឱ្យទៅជាច្រកទ្វារសម្រាប់សេវាកម្មទិញទំនិញ និងសេវាកម្មអនឡាញផ្សេងៗទៀត។ សម្រាប់ទីផ្សារប្រទេសឥណ្ឌា ដែលជាទីផ្សារបច្ចេកវិទ្យាមានសន្ទុះរីកចម្រើនយ៉ាងខ្លាំង ការតភ្ជាប់គ្នារវាង Gemini និង Flipkart អាចនឹងផ្លាស់ប្តូរទម្លាប់របស់អ្នកប្រើប្រាស់ក្នុងការទិញទំនិញអនឡាញនាពេលអនាគត។

យ៉ាងណាមិញ មុខងារនេះស្ថិតក្នុងដំណាក់កាលធ្វើតេស្តសាកល្បងប៉ុណ្ណោះ ហើយ Google ត្រូវបានគេរំពឹងថានឹងបន្តពង្រីកលក្ខណៈពិសេស និងភាពងាយស្រួលបន្ថែមទៀត មុនពេលដាក់ឱ្យប្រើប្រាស់ជាផ្លូវការទូទាំងប្រទេស៕