(បរទេស)៖​ Michael Olise ដែលត្រូវលេងក្នុងនាមកីឡាករបម្រុង ជាអ្នកទាត់បញ្ចូលទីគ្រាប់ជ័យជម្នះចុងម៉ោងសម្រាប់មាន់គកបារាំង យកឈ្នះម្ចាស់ផ្ទះប៊ែលហ្សិក ១-០ ក្នុងប្រកួតទី២ នៅពានលីគអឺរ៉ុប UEFA Nations League 2026-27 និងជា ៣ពិន្ទុលើកទី២ ជាប់ៗគ្នាផងដែរ ស្ថិតក្រោមការដឹកនាំរបស់លោក Zinedine Zidane។

ពីគេហទំព័រកីឡា BBC បានចេញផ្សាយថា ខ្សែប្រយុទ្ធស្លាបមកពីក្លិប Bayern Munich របស់អាល្លឺម៉ង់រូបនេះ បានចាកចេញពីកៅអីបម្រុងនៅនាទី៧៦ មុនពេលទាត់បញ្ចូលទីតែ ១គ្រាប់នៅនាទី៨៨ នៃការប្រកួតទី២ ជើងទី១ ប្រចាំ Group A1។

តាមរយៈជ័យជម្នះជាលើកទី២ នេះដែរនាំឱ្យមាន់គកបារាំងឈរទីកំពូលតារាងបណ្តោះអាសន្ន ដែលត្រូវប៉ះអតីតជើងខ្លាំង អាសូរីអ៉ីតាលីនៅរាត្រីថ្ងៃសុក្រ នៅពេលបិសាចក្រហមអឺរ៉ុប ប៊ែលហ្សិកត្រូវប៉ះតួកគីយ៉េវិញម្តង។

តំបន់ប្រយុទ្ធរបស់ប៊ែលហ្សិក ដោយរួមមាន Mika Godts និង Dodi Lukebakio សុទ្ធតែមានឱកាសរកបានគ្រាប់បាល់ ក៏ប៉ុន្តែនៅតែមិនអាចបំបែករបាំងការពាររបស់ក្រុមមាន់គកបានដដែល មិនដូចកាលយកឈ្នះម្ចាស់ផ្ទះអ៉ីតាលី ២ទល់នឹង០ នោះឡើយ៕