(បរទេស)៖ អ្នកប្រើប្រាស់ iPhone ដែលកំពុងជួបបញ្ហាថ្មអស់លឿន អាចពិចារណាកំណត់ ឬបិទមុខងារ Background App Refresh ដែលអនុញ្ញាតឱ្យកម្មវិធីធ្វើបច្ចុប្បន្នភាពព័ត៌មាននៅពីក្រោយ ទោះបីអ្នកមិនកំពុងបើកប្រើកម្មវិធីនោះក៏ដោយ។ នេះបើយោងតាមការចេញផ្សាយរបស់គេហទំព័រ BGR។

មុខងារនេះអាចឱ្យកម្មវិធីដូចជា កម្មវិធីអាកាសធាតុទាញយកការព្យាករណ៍ថ្មីៗ ឬកម្មវិធីបណ្តាញសង្គមទាញយកការបង្ហោះថ្មីៗជាមុន ខណៈ iPhone កំពុងទុកចោល។ ការធ្វើការនៅពីក្រោយ និងការទាញយកទិន្នន័យទាំងនេះ ត្រូវការថាមពលថ្ម និងធនធានដំណើរការរបស់ឧបករណ៍ ដូច្នេះវាអាចជាកត្តាមួយដែលរួមចំណែកដល់ការប្រើប្រាស់ថាមពលថ្ម។

ដើម្បីកំណត់មុខងារនេះ អ្នកប្រើប្រាស់អាចចូលទៅ Settings → General → Background App Refresh។ នៅទីនេះ អ្នកអាចជ្រើស Off ដើម្បីបិទទាំងស្រុង ឬជ្រើស Wi-Fi ដើម្បីឱ្យកម្មវិធីធ្វើបច្ចុប្បន្នភាពនៅពេលភ្ជាប់ Wi-Fi និង Wi-Fi & Cellular Data ដើម្បីអនុញ្ញាតឱ្យធ្វើបច្ចុប្បន្នភាពតាមរយៈទាំង Wi-Fi និងទិន្នន័យសេវាទូរស័ព្ទ។ អ្នកក៏អាចបិទមុខងារនេះសម្រាប់តែកម្មវិធីមួយចំនួនដែលមិនសូវចាំបាច់បានផងដែរ។

ការបិទ Background App Refresh មិនមានន័យថាកម្មវិធីនឹងឈប់ដំណើរការឡើយ។ កម្មវិធីនៅតែអាចបើក និងប្រើប្រាស់បានធម្មតា ប៉ុន្តែព័ត៌មានថ្មីៗនឹងត្រូវធ្វើបច្ចុប្បន្នភាពនៅពេលអ្នកបើកកម្មវិធី។ ដូច្នេះ អ្នកប្រើប្រាស់អាចជ្រើសរើសបិទមុខងារនេះសម្រាប់កម្មវិធីដែលតែងតែទាញយកមាតិកាថ្មីៗ ដូចជាកម្មវិធីបណ្តាញសង្គម ខណៈអាចទុកសម្រាប់កម្មវិធីដែលអ្នកចង់ឱ្យមានព័ត៌មានថ្មីៗនៅពេលបើកប្រើ។

គួរជម្រាបថា ការកំណត់ Background App Refresh តាមកម្មវិធីនីមួយៗ អាចជួយកាត់បន្ថយការងារដែលកម្មវិធីធ្វើការនៅពីក្រោយ និងអាចជួយកាត់បន្ថយការប្រើប្រាស់ថាមពល។ វាក៏ជាវិធីមួយដែលអាចឱ្យអ្នកប្រើប្រាស់រកតុល្យភាពរវាងការទទួលបានព័ត៌មានថ្មីៗ និងការប្រើប្រាស់ថ្មពេញមួយថ្ងៃ៕