(ភ្នំពេញ)៖ CAMBODIA SPORT+ បន្តបោះជំហានថ្មីក្នុងការគាំទ្រវិស័យកីឡានៅកម្ពុជា តាមរយៈការចុះអនុស្សរណៈយោគយល់គ្នារយៈពេល ៥ ឆ្នាំជាមួយក្លឹបបាល់ទះក្រសួងមហាផ្ទៃ ដើម្បីគាំទ្រការអភិវឌ្ឍក្លឹប ពង្រឹងការហ្វឹកហាត់ និងបង្កើតឱកាសឱ្យកីឡាករជំនាន់ថ្មី បានអភិវឌ្ឍសមត្ថភាព និងបង្ហាញទេពកោសល្យលើព្រឹត្តិការណ៍ប្រកួតថ្នាក់ជាតិ និងអន្តរជាតិ។ ពិធីចុះហត្ថលេខានេះ ប្រព្រឹត្តិឡើងក្រោមអធិបតីភាពលោកឧត្តមសេនីយ៍ត្រី ប៊ុន ឈុនគីម ប្រធានប្រតិភូសមាគមបាល់ទះក្រសួងមហាផ្ទៃ និងលោកអគ្គនាយកបន្តវេនអ៊ឹងវីរៈនៃក្រុមហ៊ុនខ្មែរ ប៊ែវើរីជីស។

កិច្ចសហការរយៈពេល ៥ ឆ្នាំនេះ គឺជាជំហានថ្មីមួយរបស់ CAMBODIA SPORT+ ដែលផ្តោតសំខាន់លើការគាំទ្រផែនការអភិវឌ្ឍ របស់ក្លឹបបាល់ទះក្រសួងមហាផ្ទៃ ពង្រឹងគុណភាពនៃការហ្វឹកហាត់ និងបង្កើនឱកាសប្រកួតប្រជែងសម្រាប់កីឡាករ។ ការគាំទ្ររយៈពេលវែងនេះ នឹងរួមចំណែកជួយឱ្យក្លឹបមានមូលដ្ឋានកាន់តែរឹងមាំ និងបណ្តុះកីឡាករដែលមានសមត្ថភាព សម្រាប់អនាគតវិស័យបាល់ទះកម្ពុជា។

កន្លងមក CAMBODIA SPORT+ បានចូលរួមគាំទ្រវិស័យកីឡាជាបន្តបន្ទាប់ ទាំងក្នុងប្រទេស និងលើឆាកអន្តរជាតិ រួមមានកីឡាបាល់ទះ កីឡារត់ប្រណាំង និងកីឡា Kickboxing ដោយផ្តោតលើការបង្កើតឱកាស ឱ្យកីឡាករខ្មែរបានប្រកួតប្រជែង ដកស្រង់បទពិសោធន៍ និងអភិវឌ្ឍសមត្ថភាព។

តាមរយៈកិច្ចសហការថ្មីនេះ CAMBODIA SPORT+ សង្ឃឹមថា នឹងអាចបន្តរួមចំណែកជាមួយក្លឹបបាល់ទះក្រសួងមហាផ្ទៃ ក្នុងការបណ្តុះធនធានកីឡាករជំនាន់ក្រោយ ជំរុញការចូលរួមលេងកីឡារបស់យុវជន និងបង្កើតមូលដ្ឋានសម្រាប់កីឡាករខ្មែរ ឈានទៅសម្រេចសមិទ្ធផលថ្មីៗ ដើម្បីលើកកម្ពស់កិត្តិយសជាតិលើឆាកអន្តរជាតិ។

CAMBODIA SPORTS សហការជាមួយក្លឹបបាល់ទះក្រសួងមហាផ្ទៃ បន្តលើកស្ទួយវិស័យកីឡាបាល់ទះឲ្យកាន់តែខ្លាំង.!៕