(បរទេស)៖ ក្រុមហ៊ុន Apple បានឱ្យដឹងថា តម្រូវការកុម្ម៉ង់ទុកមុនសម្រាប់ iPhone Duo ដែលជាទូរសព្ទអេក្រង់បត់ដំបូងរបស់ខ្លួន មានកម្រិត «អស្ចារ្យលើសពីការរំពឹងទុក» បន្ទាប់ពីស្តុកសម្រាប់ការបញ្ជាទិញតាមអនឡាញត្រូវបានអស់យ៉ាងឆាប់រហ័ស។ ការកុម្ម៉ង់ទុកមុនបានចាប់ផ្តើមនៅថ្ងៃទី១៦ ខែតុលា ប៉ុន្តែពេលវេលាដឹកជញ្ជូនសម្រាប់ការបញ្ជាទិញថ្មីត្រូវបានរុញទៅដល់ចុងខែមករា ឆ្នាំ២០២៧។ ទោះជាយ៉ាងណា ក្រុមហ៊ុននៅតែបន្តទទួលការបញ្ជាទិញ និងអះអាងថាកំពុងខិតខំដឹកជញ្ជូនផលិតផលនេះទៅដល់អតិថិជនឱ្យបានឆាប់បំផុត។ iPhone Duo មានតម្លៃចាប់ពី ១,៩៩៩ដុល្លារ និងឡើងដល់ ៣,១៩៩ដុល្លារ សម្រាប់ម៉ូដែលមានទំហំផ្ទុកទិន្នន័យ ២តេរ៉ាបៃ (2TB)។ នេះបើយោងតាមការចេញផ្សាយរបស់សារព័ត៌មាន Financial Times នៅថ្ងៃទី១៧ ខែតុលា ឆ្នាំ២០២៦។

iPhone Duo ត្រូវបានបង្ហាញកាលពីខែកញ្ញា ក្រោមការដឹកនាំរបស់លោក John Ternus នាយកប្រតិបត្តិ (CEO) ថ្មីរបស់ Apple។ ផលិតផលនេះត្រូវបានចាត់ទុកថាជាការផ្លាស់ប្តូររចនាបថដ៏ធំមួយរបស់ iPhone ក្នុងរយៈពេលជិតពីរទសវត្សរ៍ ខណៈ iPhone នៅតែបង្កើតចំណូលប្រហែលពាក់កណ្តាលនៃការលក់សរុបរបស់ក្រុមហ៊ុន។ ទន្ទឹមនឹងតម្រូវការខ្ពស់ Apple កំពុងប្រឈមនឹងបញ្ហាខ្វះខាតគ្រឿងបន្លាស់នៅទូទាំងឧស្សាហកម្ម ជាពិសេសបន្ទះឈីបអង្គចងចាំ ដែលអាចរឹតត្បិតការផ្គត់ផ្គង់។ ការពន្យារពេលដឹកជញ្ជូនរយៈពេលច្រើនខែបែបនេះក៏ជារឿងកម្រសម្រាប់ Apple ផងដែរ។

មុនពេលចេញលក់ អ្នកវិភាគរំពឹងថា iPhone Duo នឹងទាក់ទាញអតិថិជនមួយក្រុមដែលមានលទ្ធភាពចំណាយខ្ពស់ និងសុខចិត្តបង់ប្រាក់បន្ថែមសម្រាប់ទូរសព្ទលំដាប់ខ្ពស់។ ចំណែក iPhone 18 Pro និង Pro Max ដែលចេញលក់កាលពីខែកញ្ញា ក៏ទទួលបានការលក់ខ្លាំងដែរ ទោះបីទីផ្សារស្មាតហ្វូនពិភពលោកកំពុងធ្លាក់ចុះក៏ដោយ។ ក្រុមហ៊ុនស្រាវជ្រាវទីផ្សារ Counterpoint Research បានវាយតម្លៃថា iPhone 18 Pro មានការចេញលក់ខ្លាំងជាងម៉ូដែលជំនាន់មុន ជាពិសេសនៅប្រទេសចិន និងឥណ្ឌា។

ដោយឡែក លោក Tim Cook ប្រធានប្រតិបត្តិរបស់ Apple បានប្រាប់ប្រព័ន្ធផ្សព្វផ្សាយចិនថា មុខងារបញ្ញាសិប្បនិម្មិត Apple Intelligence ដែលត្រូវបានអភិវឌ្ឍរួមគ្នាជាមួយក្រុមហ៊ុន Alibaba ទទួលបានការអនុម័តពីនិយតករចិនហើយ។ ការអនុម័តនេះបើកផ្លូវឱ្យ Apple ដាក់ឱ្យប្រើប្រាស់មុខងារ AI ទាំងនេះនៅប្រទេសចិន បន្ទាប់ពីបានប្រកាសគម្រោងនេះជាលើកដំបូងអស់រយៈពេលជាងពីរឆ្នាំ៕