(វ៉ាស៊ីនតោន)៖ ក្រុមហ៊ុនបច្ចេកវិទ្យាយក្ស Meta ដែលជាក្រុមហ៊ុនមេរបស់ Facebook និង Instagram បានប្រកាសជាផ្លូវការ អំពីការបោះផ្សាយភាគហ៊ុនប្រភេទថ្មីគ្មានសិទ្ធិបោះឆ្នោត (Non-voting shares) ដើម្បីប្រមូលទុនទ្រទ្រង់ការវិនិយោគយ៉ាងសន្ធឹកសន្ធាប់ លើបច្ចេកវិទ្យាប្រាជ្ញាសិប្បនិម្មិត (AI)។ ជាមួយគ្នានេះ ថ្នាក់ដឹកនាំក្រុមហ៊ុនបានដាក់ចេញនូវចក្ខុវិស័យវែងឆ្ងាយ ដោយកំណត់យកកម្មវិធី AI Agent ថ្មីដែលមានឈ្មោះថា «Muse» ជាបេះដូងនៃយុទ្ធសាស្ត្រអាជីវកម្មនាពេលអនាគត។

ក្រោយការប្រកាសនេះ តម្លៃភាគហ៊ុនរបស់ Meta បានកើនឡើងជាង ៤% នៅក្នុងការជួញដូរបន្ថែមម៉ោង ខណៈក្រុមហ៊ុនបានព្យាករណ៍ពីចំណូលក្នុងត្រីមាសទី៤ ខ្ពស់ជាងការរំពឹងទុករបស់ទីផ្សារ Wall Street។ ដើម្បីទទួលបានប្រភពទុនសម្រាប់ទិញយកក្រុមហ៊ុនផ្សេងៗ និងរក្សាកំពូលអ្នកជំនាញបច្ចេកវិទ្យា Meta នឹងចេញភាគហ៊ុនប្រភេទ Class C Common Stock នៅខែមករា ឆ្នាំ២០២៧។ ការចេញភាគហ៊ុននេះ មានទម្រង់ស្មើនឹងការបំបែកភាគហ៊ុនពីរយកមួយ (2-for-1 stock split) ដែលអនុញ្ញាតឱ្យក្រុមហ៊ុនរៃអង្គាសទុនបន្ថែមបាន ដោយមិនប៉ះពាល់ដល់សិទ្ធិសម្រេចចិត្ត និងអំណាចគ្រប់គ្រងរបស់លោក Mark Zuckerberg ឡើយ។

លោក Mark Zuckerberg នាយកប្រតិបត្តិរបស់ Meta បានឱ្យដឹងថា ត្រឹមរយៈពេលមួយខែកន្លះប៉ុណ្ណោះ មានអ្នកប្រើប្រាស់ជាង ១០លាននាក់នៅសហរដ្ឋអាមេរិក និងកាណាដា បានបង្កើតគណនីប្រើប្រាស់ Muse។ លោកបានសម្តែងក្តីរំពឹងថា Muse នឹងអាចទាក់ទាញអ្នកប្រើប្រាស់រាប់ពាន់លាននាក់នៅថ្ងៃអនាគត និងបង្កើតប្រាក់ចំណូលក្នុងម្នាក់ៗបានខ្ពស់ជាងបណ្តាញសង្គមបច្ចុប្បន្ន។ ទោះបីជាចំណាយលើការប្រតិបត្តិការ AI មានកម្រិតខ្ពស់ក៏ដោយ Meta បានសម្រេចចិត្តបើកឱ្យប្រើប្រាស់ដោយឥតគិតថ្លៃជាមុនសិន ដើម្បីបង្កើតបណ្តាញអ្នកប្រើប្រាស់ឱ្យបានធំ (Network Effect) ប៉ុន្តែក្រុមហ៊ុនគ្រោងនឹងចាប់ផ្តើមទាញយកប្រាក់ចំណូលលឿនជាងផលិតផលមុនៗ។ លោកស្រី Susan Li នាយកផ្នែកហិរញ្ញវត្ថុ (CFO) បានបញ្ជាក់ថា អាជីវកម្ម AI នឹងចាប់ផ្តើមចូលរួមចំណែកបង្កើតចំណូលបន្ថែមដល់ក្រុមហ៊ុនចាប់ពីឆ្នាំ២០២៧ តទៅ។

ទោះបីជា លទ្ធផលអាជីវកម្មមានសញ្ញាវិជ្ជមាន ប៉ុន្តែ Meta នៅតែប្រឈមមុខនឹងបញ្ហាផ្លូវច្បាប់ធ្ងន់ធ្ងរ។ តុលាការនៅរដ្ឋ New Mexico បានបង្គាប់ឱ្យ Meta បង់ប្រាក់ពិន័យចំនួន ២៥ ពាន់លានដុល្លារ ពាក់ព័ន្ធនឹងការកុហក់ប្រជាពលរដ្ឋលើការចែករំលែកទិន្នន័យ និងព័ត៌មានមិនពិត។ បន្ថែមពីនេះ កាលពីខែសីហា Meta បានយល់ព្រមបង់ប្រាក់ចំនួន ១៨ ពាន់លានដុល្លារក្នុងរយៈពេល ១០ឆ្នាំ ដើម្បីបញ្ចប់បណ្តឹងជាមួយរដ្ឋនានានៅអាមេរិក ជុំវិញផលប៉ះពាល់ និងការញៀនបណ្តាញសង្គមរបស់កុមារ។ ការកាត់កងចំណាយផ្លូវច្បាប់ប្រមាណ ៩,៨៩ ពាន់លានដុល្លារ ក្នុងត្រីមាសនេះ បានធ្វើឱ្យប្រាក់ចំណេញក្នុងមួយភាគហ៊ុន (EPS) ធ្លាក់មកត្រឹម ៣,៨៣ដុល្លារ (បើគ្មានការកាត់កងនេះទេ EPS អាចសម្រេចបានដល់ ៧,៤០ដុល្លារ)។

អ្នកវិភាគបានលើកឡើងថា ទោះបីជា Meta កំពុងទទួលបានការគាំទ្រពីវិនិយោគិនលើផលិតផល AI ថ្មីក៏ដោយ ប៉ុន្តែបញ្ហាសុវត្ថិភាព និងឯកជនភាពទិន្នន័យនៅតែជាប្រធានបទក្តៅដែលក្រុមហ៊ុនត្រូវដោះស្រាយជាចាំបាច់៕