(ភ្នំពេញ)៖ បន្ទាប់ពីខកខានអស់រយៈពេលប្រមាណ ២រដូវកាល ការប្រកួតជម្រើសជើងឯកលីគកទី២ កម្ពុជា នឹងត្រឡប់មកវិញនាពាក់កណ្ដាលខែវិច្ឆិកាខាងមុខ ដោយមានបេក្ខភាព ៥ក្រុមត្រូវប្រកួតប្រជែង រួមមានក្លិបភ្នំពេញស៊ីធីអេហ្វស៊ី, ឡាយអិនឃីងអេហ្វស៊ី, សៀមរាបយូណាយធីត, ឈើតុំ-ពោធិ៍សាត់ និង កណ្ដាលយូណាយធីត។

ជាមួយការត្រឡប់មកវិញនៃលីគទី២ នេះដែរ មិនត្រឹមបង្កើតនូវរសជាតិថ្មីសម្រាប់វិស័យបាល់ទាត់ជាតិ ក៏ដូចជាផ្ដល់ឱកាសឲ្យក្រុមទើបបង្កើនកម្រិតអភិវឌ្ឍន៍ បានចូលរួមប្រកួតប្រជែងនោះទេ តែថែមទាំងមានឥទ្ធិពលដល់លីគកំពូលកម្ពុជារដូវកាលថ្មីទៀតផង ពោលគឺនឹងរុញឲ្យលីគកំពូលឆ្នាំក្រោយ កើនបេក្ខភាពប្រកួតប្រជែងដល់ ១២ក្លិបឯណោះ។

ក្រោយបញ្ចប់សិក្ខាសាលា និងចាប់ឆ្នោតប្រកួតកាលពីម្សិលមិញ លោក Peter Koo នាយកគ្រប់គ្រងទូទៅក្រុមហ៊ុនខេមបូឌានព្រីមៀរលីគបានឲ្យដឹងថា ក្នុងចំណោមបេក្ខភាព ៥ក្រុម ដែលត្រូវប្រជែងជើងឯកលីគទី២ ឆ្នាំ២០២៦/២៧ នឹងត្រូវធ្វើការប្រកួតសន្សំពិន្ទុវិលជុំចំនួន ៤ជុំ ដើម្បីកំណត់ក្រុមមានពិន្ទុខ្ពស់ជាងគេ ក្លាយជាម្ចាស់ពាន ព្រមទាំងទទួលបានកៅអីលេងលីគកំពូលកម្ពុជា ឆ្នាំ២០២៧/២៨ ដោយស្វ័យប្រវត្តិ។

បន្ថែមលើនេះក្រុមជើងឯករង ឬក្រុមចំណាត់ថ្នាក់លេខ២ នៃលីគទី២ ក៏នឹងមានឱកាសឡើងទៅលេងលីគកំពូលផងដែរ តែត្រូវឆ្លងកាត់ការប្រកួតជម្រុះ (Play-Off) ទល់នឹងក្រុមចំណាត់ថ្នាក់លេខ១១ នៃលីគកំពូលកម្ពុជា ឆ្នាំ២០២៦/២៧ ដើម្បីប្រជែង និងរក្សាកៅអីលីគកំពូលឆ្នាំក្រោយ។ ដូច្នេះលីគកកំពូលរដូវកាលខាងមុខ នឹងកើនដល់ ១២ក្លិប ពោលគឺកើនឡើង ១ក្លិប បើធៀបនឹងការប្រកួតរដូវកាលនេះ៕