(ភ្នំពេញ)៖ ក្រុមហ៊ុន Ganzberg បានបំបែកកំណត់ត្រាប្រវត្តិសាស្ត្រជាថ្មីម្តងទៀត ដោយប្រកាសនាំយកកំពូលតារា K-Pop ល្បីៗលំដាប់ពិភពលោកចំនួន ៣ ក្រុម មកអង្រួនមហាព្រឹត្តិការណ៍ប្រគំតន្ត្រី Ganzberg Super Idol Next Chapter – Season X នៅកោះពេជ្រ នាថ្ងៃទី ២០ ខែធ្នូ ឆ្នាំ២០២៦ ខាងមុខនេះ។ ព្រឹត្តិការណ៍ដ៏អស្ចារ្យនេះបានធ្វើឲ្យអ្នកគាំទ្រ K-Pop ក្នុងប្រទេសកម្ពុជាមានការភ្ញាក់ផ្អើល និងរំភើបរីករាយយ៉ាងខ្លាំង។

ក្នុងឆ្នាំ២០២៦ នេះ Ganzberg បាននាំតារា K-Pop មកកាន់ប្រទេសកម្ពុជារហូតដល់ទៅ ៥ ដង ដែលជាកំណត់ត្រាមួយមិនធ្លាប់មានពីមុនមក និងបង្ហាញពីការប្តេជ្ញាចិត្តរបស់ក្រុមហ៊ុនក្នុងការលើកស្ទួយវិស័យទេសចរណ៍ និងសេដ្ឋកិច្ចជាតិ។ កំពូលតារា K-Pop ទាំង ៣ ក្រុមដែលនឹងចូលរួមក្នុងមហាព្រឹត្តិការណ៍នេះរួមមាន ក្រុមបុរស MONSTA X ដែលល្បីល្បាញដោយសារក្បាច់រាំដ៏មានថាមពល តារាចម្រៀង និងរ៉េប Jay Park ដែលជាស្ថាបនិកផលិតកម្ម AOMG និងតារាស្រី Dayoung សមាជិកក្រុម WJSN។

នេះជាឱកាសដ៏កម្រមួយសម្រាប់អ្នកគាំទ្រកម្ពុជាបានជួបផ្ទាល់ជាមួយតារាដែលខ្លួនស្រលាញ់។ សំបុត្រទស្សនានឹងចាប់ផ្តើមដាក់លក់នៅលើកម្មវិធី BookMe+ នៅថ្ងៃទី ២ ខែវិច្ឆិកា ខាងមុខនេះ។ ដូច្នេះ សូមកុំភ្លេចត្រៀមខ្លួន និង Outfit ដ៏ទាក់ទាញដើម្បីចូលរួមអបអរសាទរព្រឹត្តិការណ៍ដ៏ធំនេះជាមួយ Ganzberg។