(តូក្យូ)៖ ក្រុមហ៊ុនអាជីវកម្មធំៗជាច្រើននៅក្នុងប្រទេសជប៉ុន បានប្រញាប់ប្រញាល់ចាត់វិធានការផ្តល់ប្រាក់សំណង និងសងជំងឺចិត្តដល់អ្នកប្រើប្រាស់ បន្ទាប់ពីរងការវាយប្រហារតាមប្រព័ន្ធអ៊ីនធឺណិត (Cyberattacks) យ៉ាងធ្ងន់ធ្ងរជាបន្តបន្ទាប់ ដែលបង្កការរំខានដល់សេវាកម្មអ៊ីនធឺណិត និងបង្កើតជាក្តីបារម្ភកាន់តែខ្លាំងចំពោះស្ថិរភាពសេដ្ឋកិច្ចជាតិ។

លោក Masatoshi Kumagai អគ្គនាយកប្រតិបត្តិ (CEO) នៃក្រុមហ៊ុន GMO Internet បានបញ្ជាក់កាលពីថ្ងៃអាទិត្យថា ក្រុមហ៊ុននឹងទទួលខុសត្រូវរ៉ាប់រងលើការខាតបង់ផ្សេងៗដែលកើតចេញពីការចូលប្រើប្រាស់ដោយគ្មានការអនុញ្ញាត លើប្រព័ន្ធជួញដូររូបិយប័ណ្ណបរទេស (FX Trading)។ បន្ថែមពីនេះ ក្រុមហ៊ុនបានសម្រេចផ្តល់ប្រាក់ចំនួន ៥,០០០ យ៉េន (ប្រមាណ ៣២ ដុល្លារអាមេរិក) ជូនដល់អតិថិជនទាំងអស់ជា «កាយវិការបង្ហាញពីឆន្ទៈល្អដំបូង»។ ក្រោយព័ត៌មាននៃការវាយប្រហារនេះត្រូវ បានផ្សព្វផ្សាយ តម្លៃភាគហ៊ុនរបស់ក្រុមហ៊ុន GMO Internet ដែលមានទុនទីផ្សារសរុបប្រមាណ ២,៦ ពាន់លានដុល្លារ ឆ្ពោះទៅកាន់ការធ្លាក់ចុះរហូតដល់ ១១% នៅក្នុងទីផ្សារភាគហ៊ុនទីក្រុងតូក្យូ។ លើសពីនេះ ក្រុមហ៊ុនបានបង្ហាញថា ខ្លួនបានទទួលសារជម្រិតទារប្រាក់ ព្រមទាំងការគំរាមកំហែងទម្លាយទិន្នន័យសម្ងាត់ពីក្រុម Hacker ប៉ុន្តែ GMO Internet បានបដិសេធមិនធ្វើតាមការទាមទារឡើយ ហើយបានស្នើសុំវិធានការការពារស៊ីបប៊ើពីរដ្ឋាភិបាល ព្រមទាំងសហការយ៉ាងជិតស្និទ្ធជាមួយអាជ្ញាធរប៉ូលីសដើម្បីដោះស្រាយ។

ដោយឡែក នៅក្នុងព្រឹត្តិការណ៍ដោយឡែកមួយទៀត ក្រុមហ៊ុន Park24 ដែលជាប្រតិបត្តិករសេវាកម្មចែករំលែករថយន្ត Times ក៏បានប្រកាសផ្តល់ប្រាក់សំណងចំនួន ៣,០០០ យ៉េន ជូនដល់អតិថិជនដែលរងផលប៉ះពាល់ ក្នុងករណីធ្លាយទិន្នន័យផ្ទាល់ខ្លួន (Data Breach) ផងដែរ។

អ្នកជំនាញបានកត់សម្គាល់ថា បទល្មើសតាមអ៊ីនធើណិតបច្ចុប្បន្នមានភាពរហ័ស ដើមទុនទាប និងលំបាកក្នុងការស្វែងរក ឬទប់ស្កាត់ ដោយសារក្រុមចោរបច្ចេកវិទ្យាបានប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីស្កេនរកចន្លោះប្រហោងសុវត្ថិភាពក្នុងភាសា PHP និងបង្កើតយុទ្ធនាការបោកប្រាស់ (Phishing)។ ជាការឆ្លើយតប រដ្ឋាភិបាលជប៉ុនបានរៀបចំបង្កើតក្រុមការងារពិសេសមួយ ដើម្បីធ្វើការសម្តែងទម្រង់វាយប្រហារ (Simulation) ដោយប្រើ AI ក្នុងគោលបំណងស្វែងរក និងទប់ស្កាត់ចំណុចខ្សោយនៃប្រព័ន្ធបច្ចេកវិទ្យាជាតិឱ្យបានទាន់ពេលវេលា៕