(បរទេស)៖ ក្រុមហ៊ុន Apple ត្រូវបានរាយការណ៍ថា គ្រោងប្រកាសកុំព្យូទ័រយួរដៃ MacBook Pro ស៊េរីថ្មី ទំហំ ១៤ អ៊ីញ និង ១៦ អ៊ីញ ដែលបំពាក់អេក្រង់ OLED អាចប៉ះបញ្ជាបាន (Touchscreen) នៅថ្ងៃទី២៨ ខែតុលា ឆ្នាំ២០២៦។ យោងតាមលោក Mark Gurman អ្នកសារព័ត៌មាន Bloomberg ដែលត្រូវបាន MacRumors ដកស្រង់ចុះផ្សាយនៅថ្ងៃទី២៦ ខែតុលា ឆ្នាំ២០២៦ ម៉ូដែលថ្មីទាំងនេះនឹងមានរូបរាងស្រដៀងនឹងម៉ូដែលបច្ចុប្បន្ន ប៉ុន្តែមានទម្ងន់ស្រាលជាងមុន និងប្រើ Dynamic Island ជំនួសស្នាមឆកនៅផ្នែកខាងលើអេក្រង់។

MacBook Pro ស៊េរីថ្មីត្រូវបានរំពឹងថានឹងប្រើបន្ទះឈីប M5 Pro និង M5 Max។ ដោយសារអេក្រង់ OLED មានតម្លៃខ្ពស់ជាងអេក្រង់ mini-LED ដែលប្រើក្នុងម៉ូដែលបច្ចុប្បន្ន តម្លៃចាប់ផ្តើមរបស់ម៉ូដែលថ្មីអាចកើនឡើងរហូតដល់ ៥០០ដុល្លារ។ បច្ចុប្បន្ន ម៉ូដែលទំហំ ១៤ អ៊ីញមានតម្លៃចាប់ពី ២,៤៩៩ដុល្លារ ខណៈម៉ូដែលទំហំ ១៦ អ៊ីញមានតម្លៃចាប់ពី ២,៩៩៩ដុល្លារនៅសហរដ្ឋអាមេរិក។

ចំណុចថ្មីមួយទៀតគឺប្រព័ន្ធប្រតិបត្តិការ macOS Golden Gate ដែលត្រូវបានគេរាយការណ៍ថានឹងមានចំណុចប្រទាក់សម្របតាមការបញ្ជាដោយការប៉ះ។ លោក Gurman បានពន្យល់ថា «ប្រព័ន្ធនឹងគិតគូរពីរបៀបប្រើប្រាស់មុនៗ ដោយបង្ហាញឧបករណ៍បញ្ជាផ្សេងៗ អាស្រ័យលើថាតើអ្នកប្រើបាន Touchscreen ឬប្រើ Trackpad»។ លោកបន្ថែមថា ការប៉ះប៊ូតុងអាចបង្ហាញម៉ឺនុយនៅជុំវិញម្រាមដៃរបស់អ្នកប្រើ ហើយ Dock និង Menu Bar ក៏ត្រូវបានកែសម្រួលឱ្យងាយស្រួលប្រើដោយការប៉ះផងដែរ។

ទោះជាយ៉ាងណា Apple ត្រូវបានរាយការណ៍ថានឹងចាត់ទុក Touchscreen ជាជម្រើសបញ្ជាបន្ថែម រួមជាមួយក្តារចុច និង Trackpad មិនមែនជាការជំនួសទាំងស្រុងនោះទេ។ ចំណែក MacBook Pro ម៉ូដែលបច្ចុប្បន្នដែលប្រើអេក្រង់ mini-LED នឹងបន្តមានលក់មួយរយៈទៀត មុនពេលត្រូវបញ្ឈប់ការផលិតនៅពេលក្រោយ៕