(វ៉ាស៊ីនតោន)៖ ក្រុមហ៊ុនបច្ចេកវិទ្យាយក្ស Meta Platforms បានប្រកាសកាលពីថ្ងៃអង្គារថា ខ្លួនបានបង្កើនទំហំទឹកប្រាក់នៃការរៃអង្គាសទុនតាមរយៈភាគហ៊ុនដល់កម្រិតកំណត់ត្រា ៩៧,៥ ពាន់លានដុល្លារអាមេរិក ដែលជាផែនការប្រមូលទុនដ៏ធំបំផុតមួយក្នុងប្រវត្តិសាស្ត្ររបស់ក្រុមហ៊ុន ដើម្បីពង្រីកហេដ្ឋារចនាសម្ព័ន្ធបញ្ញាសិប្បនិម្មិត (AI Infrastructure) យ៉ាងសន្ធឹកសន្ធាប់។

យោងតាមសេចក្តីប្រកាសរបស់ក្រុមហ៊ុន Meta ផែនការរៃអង្គាសទុននេះ រួមមាន៖
- ការបោះផ្សាយភាគហ៊ុន ដោយដំឡើងពី ២២,៥ ពាន់លានដុល្លារ មកដល់ ២៥ ពាន់លានដុល្លារ ក្នុងតម្លៃ ៦២៥,០០ ដុល្លារក្នុងមួយភាគហ៊ុន។
- ភាគហ៊ុនបញ្ញើ៖ ការដាក់លក់ភាគហ៊ុនបញ្ញើចំនួន ២៥០ លានភាគហ៊ុន ក្នុងតម្លៃ ៥០ ដុល្លារក្នុងមួយភាគហ៊ុន។
- កម្មវិធីលក់ភាគហ៊ុនជាបន្តបន្ទាប់ ៖ ផែនការលក់ភាគហ៊ុនបន្ថែមជាបន្តបន្ទាប់តម្លៃរហូតដល់ ៦០ ពាន់លានដុល្លារ ដែលនឹងត្រូវចាប់ផ្តើមក្រោយពេលភាគហ៊ុនប្រភេទ Class C ដែលគ្មានសិទ្ធិបោះឆ្នោតចាប់ផ្តើមជួញដូរ ដែលរំពឹងទុកនៅត្រីមាសទី១ ឆ្នាំ២០២៧។

ផែនការរៃអង្គាសទុនដ៏មហិជ្ជកម្មនេះ ក៏បានទាក់ទាញចំណាប់អារម្មណ៍ និងការចូលរួមវិនិយោគជាទឹកប្រាក់រហូតដល់ ៥ ពាន់លានដុល្លារ ពីសំណាក់ក្រុមហ៊ុនផលិតបន្ទះឈីបយក្សៗ រួមមាន Nvidia, Advanced Micro Devices (AMD) និង Broadcom ខណៈដែល Nvidia បានប្រកាសថា នឹងវិនិយោគទឹកប្រាក់ ៣ ពាន់លានដុល្លារ ក្នុងកញ្ចប់ភាគហ៊ុនរបស់ Meta ផងដែរ។

ការចូលរួមហិរញ្ញវត្ថុទៅវិញទៅមករវាងក្រុមហ៊ុនផលិតបន្ទះឈីប និងក្រុមហ៊ុនបច្ចេកវិទ្យាយក្សនេះ បាននិងកំពុងបង្កើតជាសំណួរ និងការបារម្ភពីសំណាក់អ្នកវិភាគជុំវិញ «រង្វង់ចរន្តទុនវិលជុំ» នៅក្នុងឧស្សាហកម្ម AI នាពេលបច្ចុប្បន្ន ដែលក្រុមហ៊ុនផ្គត់ផ្គង់បន្ទះឈីបជួយផ្តល់ហិរញ្ញវត្ថុដល់អតិថិជនធំបំផុតរបស់ខ្លួនវិញ។

ទោះជាយ៉ាងណា វិភាគវិស័យមើលឃើញថា យុទ្ធសាស្ត្រនេះបង្ហាញពីការប្តេជ្ញាចិត្តខ្ពស់របស់ Meta ក្នុងការប្រជែងជាមួយគូប្រជែងដូចជា OpenAI និង Anthropic ខណៈដែលវិស័យបច្ចេកវិទ្យាយក្សកំពុងប្តូរទម្លាប់ពីការប្រើប្រាស់សាច់ប្រាក់សុទ្ធ មករៃអង្គាសទុនពីទីផ្សារភាគហ៊ុន និងបំណុលដើម្បីពង្រឹងកម្លាំងម៉ាស៊ីន AI របស់ខ្លួន៕