(ភ្នំពេញ)៖ ក្រុមហ៊ុន កាណាឌីយ៉ា គ្រុប បានទទួលស្វាគមន៍គណៈប្រតិភូមកពីក្រសួងពាណិជ្ជកម្ម និងឧស្សាហកម្មហ្វីលីពីន (DTI) ដែលដឹកនាំដោយរដ្ឋមន្ត្រីក្រសួងពាណិជ្ជកម្មហ្វីលីពីន លោកស្រី Maria Cristina Aldeguer Roque និងលោកស្រី Bianca Pearl R. Sykimte នាយិកាការិយាល័យទីផ្សារនាំចេញនៃក្រសួងពាណិជ្ជកម្ម និងឧស្សាហកម្មហ្វីលីពីន កាលពីថ្ងៃទី២៣ ខែតុលា ឆ្នាំ ២០២៦។

គណៈប្រតិភូត្រូវបានទទួលស្វាគមន៍នៅអគារ កាណាឌីយ៉ា ដោយឧកញ៉ាវេជ្ជបណ្ឌិត ពុង ការ៉ូលីន អនុប្រធានក្រុមប្រឹក្សាភិបាលនៃក្រុមហ៊ុន កាណាឌីយ៉ា គ្រុប និង ក្រុមហ៊ុន អូស៊ីអាយស៊ី (OCIC) ព្រមទាំងលោក Thierry Tea អនុប្រធានក្រុមហ៊ុន OCIC។

កិច្ចប្រជុំនេះ បានផ្តោតលើការស្វែងរកឱកាសសម្រាប់ក្រុមហ៊ុនកម្ពុជា និងហ្វីលីពីន ក្នុងការសហការគ្នា និងបង្កើតភាពជាដៃគូធុរកិច្ចថ្មីៗ។ ភាគីទាំងពីរបានពិភាក្សាអំពី ការពង្រឹងទំនាក់ទំនងរវាងសហគមន៍ធុរកិច្ចនៃប្រទេសទាំងពីរ ការចែករំលែកជំនាញ និងការស្វែងរកវិស័យដែលមានសក្តានុពលសម្រាប់កិច្ចសហប្រតិបត្តិការទៅវិញទៅមក។​

កិច្ចពិភាក្សាបានគ្របដណ្តប់លើវិស័យជាច្រើន រួមមាន៖ សុខាភិបាល អាហារ និងភេសជ្ជៈ ថាមពល ហេដ្ឋារចនាសម្ព័ន្ធ អប់រំ លក់រាយ អចលនទ្រព្យ ការវិនិយោគ និងអាកាសចរណ៍។

ការពិភាក្សានេះធ្វើឡើងបន្ទាប់ពី OCIC បានបង្កើតភាពជាដៃគូថ្មីៗនេះជាមួយ World Citi Colleges International, Inc. (WCCI) ដែលជាស្ថាប័នអប់រំមួយរបស់ប្រទេសហ្វីលីពីន។ នៅថ្ងៃទី១ ខែតុលា ឆ្នាំ២០២៦ OCIC និង WCCI បានចុះហត្ថលេខាលើកិច្ចព្រមព្រៀងមួយដើម្បីបង្កើតសាកលវិទ្យាល័យ «WCC International Aero Tech University» នៅរាជធានីភ្នំពេញ ដោយនាំយកបទពិសោធន៍របស់ប្រទេសហ្វីលីពីនលើវិស័យអប់រំ និងបណ្តុះបណ្តាលផ្នែកអាកាសចរណ៍មកកាន់ប្រទេសកម្ពុជា។ បច្ចុប្បន្ននេះ មានអ្នកជំនាញជនជាតិហ្វីលីពីនជាង ៣០នាក់ កំពុងបម្រើការងារ នៅក្នុងក្រុមហ៊ុននេះផងដែរ។

លោកស្រីវេជ្ជបណ្ឌិត ពុង ការ៉ូលីន បានបញ្ជាក់ថា៖ «ភាពជាដៃគូរបស់យើងជាមួយ WCCI គឺជាជំហានដំបូងដ៏សំខាន់មួយក្នុងការអភិវឌ្ឍទំនាក់ទំនងកាន់តែជិតស្និទ្ធ ជាមួយប្រទេសហ្វីលីពីន។ យើងសង្ឃឹមថាកិច្ចពិភាក្សានេះនឹងនាំឱ្យមានការតភ្ជាប់កាន់តែច្រើន ការផ្លាស់ប្តូរគ្នាទៅវិញទៅមកកាន់តែទូលំទូលាយ និងគម្រោងថ្មីៗ រវាងប្រទេសទាំងពីរ ជាពិសេសនៅពេលដែលប្រទេសហ្វីលីពីនជាប្រធានអាស៊ាននៅឆ្នាំ ២០២៦»។ ដោយសារប្រទេសហ្វីលីពីននឹងធ្វើជាប្រធានអាស៊ាននៅឆ្នាំ ២០២៦ ដំណើរទស្សនកិច្ចនេះគឺជាឱកាសដ៏ល្អមួយក្នុងការនាំឱ្យវិស័យធុរកិច្ចនៃប្រទេសកម្ពុជា និងហ្វីលីពីនកាន់តែខិតជិតគ្នា ហើយកំណត់វិស័យថ្មីៗសម្រាប់កិច្ចសហប្រតិបត្តិការនៅក្នុងតំបន់។

លោក Thierry Tea អនុប្រធានក្រុមហ៊ុន OCIC បានលើកឡើងថា៖ «ដោយសារខ្ញុំបានចាប់ផ្តើមអាជីពការងារនៅប្រទេសហ្វីលីពីន ហើយក្រោយមកបានបង្កើតអាជីវកម្មនៅទីនោះ ខ្ញុំមានទំនាក់ទំនងផ្ទាល់ខ្លួនយ៉ាងជិតស្និទ្ធជាមួយប្រទេសហ្វីលីពីន។ ខ្ញុំមើលឃើញឱកាសសំខាន់ៗជាច្រើនសម្រាប់កម្ពុជា និងហ្វីលីពីន ក្នុងការសហការគ្នាលើវិស័យផ្សេងៗ រួមមាន វិស័យសុខាភិបាល ហេដ្ឋារចនាសម្ព័ន្ធ និងអាកាសចរណ៍។ ជំហានបន្ទាប់ គឺការប្រែក្លាយកិច្ចពិភាក្សានេះ ទៅជាភាពជាដៃគូ និងគម្រោងជាក់ស្តែង»។

ជំនួបនេះ បានបើកផ្លូវឱ្យមានកិច្ចពិភាក្សាកាន់តែទូលំទូលាយរវាងក្រុមហ៊ុន កាណាឌីយ៉ា គ្រុប និងរដ្ឋាភិបាលហ្វីលីពីន អំពីវិស័យនានាដែលមានសក្តានុពល សម្រាប់កិច្ចសហប្រតិបត្តិការនាពេលអនាគត៕