(បរទេស)៖ ក្រុមហ៊ុន OpenAI ដែលជាអ្នកបង្កើត ChatGPT គ្រោងទិញបន្ទះឈីបបញ្ញាសិប្បនិម្មិត (AI) របស់ក្រុមហ៊ុន Google ដើម្បីបំពេញតម្រូវការកាន់តែខ្ពស់លើសមត្ថភាពគណនាសម្រាប់ AI។ កិច្ចព្រមព្រៀងដែលអាចកើតមាននេះ នឹងពង្រឹងទំនាក់ទំនងពាណិជ្ជកម្មរវាងក្រុមហ៊ុនទាំងពីរ ទោះបីជាពួកគេប្រកួតប្រជែងគ្នាក្នុងវិស័យ AI និងសេវាស្វែងរកព័ត៌មានតាមអ៊ីនធឺណិតក៏ដោយ។ កាលពីសប្តាហ៍មុន OpenAI ក៏បានប្រកាសថា ខ្លួននឹងដាក់ឱ្យប្រើប្រាស់ម៉ូដែល AI កម្រិតខ្ពស់របស់ខ្លួនតាមរយៈសេវា Google Cloud ផងដែរ។ នេះបើយោងតាមសារព័ត៌មាន The Information និងចេញផ្សាយបន្តដោយទីភ្នាក់ងារសារព័ត៌មាន Reuters ​នៅថ្ងៃទី២៨ ខែតុលា ឆ្នាំ២០២៦។

បច្ចុប្បន្ន OpenAI គឺជាអតិថិជនដ៏ធំមួយរបស់ Nvidia ដោយប្រើប្រាស់បន្ទះឈីប GPU របស់ក្រុមហ៊ុននេះ ដើម្បីបណ្តុះបណ្តាល និងដំណើរការម៉ូដែល AI។ ទោះជាយ៉ាងណា បន្ទះឈីប TPU របស់ Google កំពុងទទួលបានការចាប់អារម្មណ៍ជាជម្រើសជំនួសបន្ទះឈីប Nvidia ដោយសារក្រុមហ៊ុននានាស្វែងរកដំណោះស្រាយដែលមានតម្លៃទាបជាង។ Google បានចាប់ផ្តើមលក់បន្ទះឈីប TPU ដោយផ្ទាល់ទៅឱ្យអតិថិជនមួយចំនួននៅឆ្នាំនេះ ហើយកិច្ចព្រមព្រៀងជាមួយក្រុមហ៊ុនដូចជា Anthropic ក៏បានជំរុញតម្រូវការផងដែរ។

ទន្ទឹមនឹងនេះ Amazon, Microsoft និង Alphabet ដែលជាក្រុមហ៊ុនមេរបស់ Google គ្រោងចំណាយប្រាក់រួមគ្នារហូតដល់ ៦០០ ពាន់លានដុល្លារនៅឆ្នាំនេះ លើហេដ្ឋារចនាសម្ព័ន្ធ AI។ ទោះជាយ៉ាងណា វិនិយោគិនកំពុងចោទសួរកាន់តែខ្លាំងថា តើការចំណាយដ៏ច្រើននេះនឹងផ្តល់ផលចំណេញជាក់ស្តែងនៅពេលណា។ Alphabet រំពឹងថា នឹងចាប់ផ្តើមទទួលស្គាល់ចំណូលមួយផ្នែកតូចពីកិច្ចព្រមព្រៀងលក់បន្ទះឈីប TPU នៅចុងឆ្នាំនេះ ខណៈចំណូលភាគច្រើនត្រូវរំពឹងថានឹងទទួលស្គាល់នៅឆ្នាំ២០២៧។

ដោយឡែក កាលពីខែមិថុនា OpenAI បានបង្ហាញបន្ទះឈីប AI ផ្ទាល់ខ្លួនដំបូង ដែលរចនាឡើងដោយសហការជាមួយក្រុមហ៊ុន Broadcom ហើយគ្រោងដាក់ឱ្យប្រើប្រាស់នៅចុងឆ្នាំ២០២៦។ ផែនការនេះបង្ហាញថា OpenAI កំពុងពង្រីកជម្រើសផ្នែកបច្ចេកវិទ្យា និងប្រភពផ្គត់ផ្គង់បន្ទះឈីបរបស់ខ្លួន ដើម្បីគាំទ្រការអភិវឌ្ឍ AI ដែលកំពុងកើនឡើងយ៉ាងឆាប់រហ័ស៕