(បរទេស)៖ OpenAI កំពុងបង្កើនការប្រកួតប្រជែងជាមួយ Google ក្នុងទីផ្សារស្វែងរកព័ត៌មាន ខណៈ ChatGPT កំពុងទាក់ទាញអ្នកប្រើប្រាស់កាន់តែច្រើន។ លោក Adam Fry ប្រធានផ្នែកផលិតផលសម្រាប់អ្នកប្រើប្រាស់របស់ ChatGPT បានឱ្យដឹងថា បច្ចុប្បន្ន ចំនួនសំណួរដែលអ្នកប្រើប្រាស់សួរ ChatGPT ក្នុងគោលបំណងស្វែងរកព័ត៌មាន មានប្រហែលមួយភាគប្រាំ ឬស្មើនឹង ២០% នៃចំនួនការស្វែងរកតាម Google។ ការលើកឡើងនេះបង្ហាញពីការរីកចម្រើនរបស់ ChatGPT ក្នុងទីផ្សារដែល Google ធ្លាប់មានឥទ្ធិពលយ៉ាងខ្លាំង។ នេះបើយោងតាមការចេញផ្សាយដោយ Business Insider នៅថ្ងៃទី០៤ ខែវិច្ឆិកា ឆ្នាំ២០២៦។

របាយការណ៍ស្ទង់មតិរបស់មជ្ឈមណ្ឌលស្រាវជ្រាវ Pew Research Center ដែលធ្វើឡើងក្នុងចំណោមមនុស្សពេញវ័យអាមេរិកនៅថ្ងៃទី១៧ ដល់ ២៣ ខែកុម្ភៈ ឆ្នាំ២០២៦ បានបង្ហាញថា ការស្វែងរកព័ត៌មានគឺជាគោលបំណងប្រើប្រាស់ Chatbot ដែលពេញនិយមបំផុត ដោយមានអ្នកឆ្លើយតប ៤២% ធ្លាប់ប្រើ AI សម្រាប់គោលបំណងនេះ។ បន្ទាប់មកគឺការប្រើប្រាស់សម្រាប់ការងារ ៣៨% ការកម្សាន្ត ២៥% និងការបង្កើត ឬកែសម្រួលរូបភាពនិងវីដេអូ ២៤%។ ចំណែក ២០% ប្រើ AI ដើម្បីស្វែងរកព័ត៌មានសុខភាព និង ១០% ប្រើប្រាស់សម្រាប់ទទួលបានការគាំទ្រផ្លូវអារម្មណ៍។ ទិន្នន័យនេះបង្ហាញថា AI កំពុងក្លាយជាឧបករណ៍មួយដែលមានតួនាទីកាន់តែទូលំទូលាយក្នុងជីវិតប្រចាំថ្ងៃរបស់មនុស្ស។

បច្ចុប្បន្ន ChatGPT មានអ្នកប្រើប្រាស់ប្រចាំសប្តាហ៍ប្រមាណ ១,២ ពាន់លាននាក់ ប៉ុន្តែមិនទាន់មានទិន្នន័យច្បាស់លាស់ថា ក្នុងចំណោមអ្នកប្រើប្រាស់ទាំងនេះ មានប៉ុន្មាននាក់ប្រើប្រាស់វាសម្រាប់ស្វែងរកព័ត៌មាន ប្រៀបធៀបនឹងការសរសេរកូដ ឬបង្កើតរូបភាព។ ទន្ទឹមនឹងនេះ នាយកប្រតិបត្តិក្រុមហ៊ុន Alphabet លោក Sundar Pichai ធ្លាប់លើកឡើងថា ការរីកចម្រើនរបស់ Chatbot មិនមានន័យថា Google នឹងបាត់បង់អ្នកប្រើប្រាស់នោះទេ ដោយលោកបានប្រៀបធៀបទៅនឹងការរីកចម្រើនរបស់ TikTok ខណៈ YouTube នៅតែអាចបន្តរីកចម្រើនបាន។

គួរបញ្ជាក់ថា មូលហេតុមួយដែលធ្វើឱ្យអ្នកប្រើប្រាស់មួយចំនួនងាកមកប្រើ ChatGPT គឺការមិនពេញចិត្តចំពោះលទ្ធផលស្វែងរករបស់ Google ក្នុងរយៈពេលប៉ុន្មានឆ្នាំចុងក្រោយនេះ។ ពួកគេយល់ថា លទ្ធផលស្វែងរកមួយចំនួនពោរពេញទៅដោយគេហទំព័រដែលផ្តោតលើការបង្កើនចំណាត់ថ្នាក់ក្នុងម៉ាស៊ីនស្វែងរក (SEO) ជាជាងផ្តល់ព័ត៌មានដែលមានប្រយោជន៍ និងគួរឱ្យទុកចិត្ត។ ផ្ទុយទៅវិញ ChatGPT អាចផ្តល់ចម្លើយដោយផ្ទាល់ និងកាត់បន្ថយពេលវេលាស្វែងរកតាមគេហទំព័រជាច្រើន ទោះបីជា AI នៅតែអាចផ្តល់ព័ត៌មានមិនត្រឹមត្រូវក៏ដោយ។ ដូច្នេះ ការកើនឡើងនៃប្រជាប្រិយភាព ChatGPT អាចជាសញ្ញាបង្ហាញពីសម្ពាធប្រកួតប្រជែងកាន់តែខ្លាំងលើ Google ជាពិសេសក្នុងវិស័យស្វែងរកព័ត៌មានដែលខ្លួនធ្លាប់គ្រប់គ្រងទីផ្សារអស់រយៈពេលជាយូរមកហើយ៕