(បរទេស)៖ លោក Raul អតីតកំពូលខ្សែប្រយុទ្ធពាក់លេខ៧ នៃក្លិប Real Madrid ត្រូវបានតែងតាំងដឺកនាំក្រុមធំលើកដំបូងគឺក្លិប Real Oviedo ស្ថិតក្នុងក្របខណ្ឌទី២ អេស្ប៉ាញ ដោយមានសុពលភាពកិច្ចសន្យាដល់ខែមិថុនា ឆ្នាំ២០២៨។

ពីគេហទំព័រកីឡា BBC បានចេញផ្សាយថា បុរសសញ្ជាតិអេស្ប៉ាញ វ័យ ៤៩ឆ្នាំរូបនេះធ្លាប់បានឈ្នះពានរង្វាន់លីគអឺរ៉ុប UEFA Champions League ចំនួន ៣លើកផងដែរជាមួយ Real ដោយទើបបានចូលប្រឡូកក្នងការដឹកនាំក្រុមធំលើកដំបូង ក្នុងអាជីពបង្វឹករបស់លោក ក្រោយពេលដឹកនាំឈុតតូចរបស់ Real Madrid នៅអំឡុងឆ្នាំ២០១៩-២០២៥។

Raul ត្រូវបានតែងតាំងជំនួសកៅអីគ្រូបង្វឹក Julian Calero ដែលត្រូវបានដកតួនាទីពី Oviedo កាលពីថ្ងៃចន្ទ ដ្បិតពួកគេកំពុងស្ថិតនៅលេខរៀងទី៩ បណ្តោះអាសន្ននារដូវកាល ២០២៦-២៧។

កាលនៅជាកីឡាករ Raul ជាអតីតខ្សែប្រយុទ្ធលេចធ្លោមួយរបស់ Real Madrid ដោយរួមចំណែកឈ្នះពាន UCL ៣លើក និង ៦លើកផងដែរសម្រាប់ពានលីគ La Liga ដោយស៊ុតបាន ៣២៣គ្រាប់ ពីការចូលលេងសរុបដល់ទៅ ៧៤១ប្រកួត មុនពេលចាកចេញពីកីឡដ្ឋាន Bernabeu នៅលេងនៅក្លិប Schalke របស់អាល្លឺម៉ង់ និង Al Sadd របស់កាតា និងក្លិប New York Cosmos របស់សហរដ្ឋអាមេរិក។

សម្រាប់ជម្រើសជាតិគោជល់អេស្ប៉ាញវិញ Raul ស៊ុតបាន ៤៤គ្រាប់ ពីការចូលលេងបាន ១០២ប្រកួតទៀតផង៕