(វ៉ាស៊ីនតោន)៖ ការប្រែប្រួលយ៉ាងគំហុកនៅលើទីផ្សារភាគហ៊ុន Wall Street បានបង្កើតឱ្យមានព្រឹត្តិការណ៍ដ៏ភ្ញាក់ផ្អើលបំផុតមួយក្នុងប្រវត្តិសាស្ត្រហិរញ្ញវត្ថុបុគ្គល។ ទ្រព្យសម្បត្តិផ្ទាល់ខ្លួនប្រមាណ ៧,៤ ប៊ីលានដុល្លារអាមេរិក របស់លោក Jensen Huang ស្ថាបនិក និងជានាយកប្រតិបត្តិក្រុមហ៊ុន Nvidia បានរលាយបាត់ភ្លាមៗ ក្នុងរយៈពេលត្រឹមតែ ៣០ នាទីដំបូងនៃការជួញដូរភាគហ៊ុន។

ការធ្លាក់ចុះតម្លៃទីផ្សារ និងទ្រព្យសម្បត្តិដ៏លឿនដូចផ្លេកបន្ទោរនេះ បានកើតឡើងបន្ទាប់ពីភាគហ៊ុនរបស់ក្រុមហ៊ុន Nvidia បានដោះដូរក្នុងតម្លៃធ្លាក់ចុះយ៉ាងខ្លាំង ភ្លាមៗក្រោយពេលមានព័ត៌មានបែកធ្លាយថា ក្រុមប្រឹក្សាភិបាល Nvidia បានបើកការស៊ើបអង្កេតផ្ទៃក្នុងជុំវិញទំនាក់ទំនងស្នេហាក្រៅផ្លូវការរវាងរូបលោក និងលោកស្រី Alice Huang ចំពេលដែលមានការតាមដានពីភ្នាក់ងារសន្តិសុខសហរដ្ឋអាមេរិក លើការសង្ស័យពាក់ព័ន្ធនឹងប្រតិបត្តិការប្រមូលព័ត៌មានសម្ងាត់ និងការលួចនាំចេញបន្ទះឈីប AI។

ទ្រព្យសម្បត្តិសរុបរបស់លោក Jensen Huang ដែលធ្លាប់មានប្រមាណជាង ១៦០ ប៊ីលានដុល្លារ គឺ ជាង ៩០% ស្ថិតក្នុងទម្រង់ជាភាគហ៊ុនប្រមាណ ៣,៥% ដែលលោកកាន់កាប់នៅក្នុងក្រុមហ៊ុន Nvidia តែមួយប៉ុណ្ណោះ។ នៅពេលទីផ្សារភាគហ៊ុនបើកទ្វារជួញដូរ ៣០ នាទីដំបូង ព័ត៌មាននៃការស៊ើបអង្កេតផ្ទៃក្នុងបានធ្វើឱ្យអ្នកវិនិយោគព្រួយបារម្ភ និងប្រញាប់ប្រញាល់លក់ភាគហ៊ុន Nvidia ចេញ។ ការធ្លាក់ចុះតម្លៃភាគហ៊ុនពី ៥% ទៅ ៨% ក្នុងពេលដ៏ខ្លី បានធ្វើឱ្យតម្លៃភាគហ៊ុនសរុបដែលលោក Jensen Huang កាន់កាប់ ស្រុតចុះអស់ ៧,៤ ប៊ីលានដុល្លារ ភ្លាមៗ។

ផ្អែកលើការប៉ាន់ប្រមាណតាមពេលវេលាជាក់ស្តែង ការបាត់បង់ថវិកា ៧,៤ ប៊ីលានដុល្លារនេះ បានធ្វើឱ្យទ្រព្យសម្បត្តិរបស់លោកថយចុះមកត្រឹមរង្វង់ ១៥៤,៧ ប៊ីលានដុល្លារ ដោយជំរុញឱ្យលោកធ្លាក់ចុះចំនួន ២ ថ្នាក់ (ពីលេខ ៨ មកលេខ ១០) នៅក្នុងបញ្ជីមហាសេដ្ឋីពិភពលោករបស់ទស្សនាវដ្តី Forbes៕