(បរទេស)៖ ក្រុមហ៊ុនផលិតបន្ទះឈីបធំបំផុតលើពិភពលោកតាមការបញ្ជាទិញផលិត គឺ TSMC បានអនុម័តគម្រោងវិនិយោគរហូតដល់ ១ ពាន់លានដុល្លារ ក្នុងក្រុមហ៊ុនបញ្ញាសិប្បនិម្មិត (AI) ចំនួនពីរ គឺ Anthropic និង OpenAI។ ក្នុងនោះ TSMC គ្រោងចំណាយរហូតដល់ ៥០០ លានដុល្លារ ដើម្បីទិញភាគហ៊ុនរបស់ Anthropic តាមតម្លៃពេលក្រុមហ៊ុននេះចូលផ្សារហ៊ុនជាលើកដំបូង (IPO) និង ៥០០ លានដុល្លារទៀត ដើម្បីទិញភាគហ៊ុនប្រភេទអាទិភាព (Preferred Stock) របស់ OpenAI។ នេះបើយោងតាមការ​ចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃទី១១ ខែវិច្ឆិកា ឆ្នាំ២០២៦។

ក្រុមហ៊ុន Anthropic ដែលជាអ្នកបង្កើត AI Claude បានកំណត់តម្លៃភាគហ៊ុនសម្រាប់ការបោះផ្សាយលក់ជាសាធារណៈនៅចន្លោះពី ៧០ ទៅ ៧៨ ដុល្លារក្នុងមួយហ៊ុន ដោយមានគោលដៅវាយតម្លៃក្រុមហ៊ុនរហូតដល់ ១,៤ ទ្រីលានដុល្លារ។ ប្រសិនបើសម្រេចបាន ការចូលផ្សារហ៊ុននេះអាចក្លាយជាការបោះផ្សាយលក់ភាគហ៊ុនលើកដំបូងដ៏ធំបំផុតមួយក្នុងប្រវត្តិសាស្ត្រ។ ជាមួយគ្នានេះ Anthropic ក៏កំពុងស្វែងរកទុនចំនួន ២៦ ពាន់លានដុល្លារបន្ថែម តាមរយៈការលក់ភាគហ៊ុនជាលក្ខណៈឯកជន ដោយមានការគាំទ្រពីក្រុមហ៊ុនបច្ចេកវិទ្យាធំៗ រួមមាន Google, Nvidia, AMD និង Microsoft។

ការវិនិយោគនេះកើតឡើង ខណៈតម្រូវការបន្ទះឈីបសម្រាប់ប្រព័ន្ធ AI កំពុងកើនឡើងខ្លាំង។ TSMC ដែលជាអ្នកផ្គត់ផ្គង់បន្ទះឈីបសំខាន់ដល់ក្រុមហ៊ុន AI ដូចជា Nvidia បានរាយការណ៍ពីប្រាក់ចំណេញខ្ពស់បំផុតជាប់គ្នា ៦ត្រីមាស និងរំពឹងថាប្រាក់ចំណូលពេញមួយឆ្នាំ២០២៦ នឹងកើនឡើងប្រមាណ ៤៤%។ ទោះជាយ៉ាងណា តម្រូវការបន្ទះឈីបនៅតែខ្ពស់ជាងសមត្ថភាពផលិតរបស់ក្រុមហ៊ុន។

ដើម្បីឆ្លើយតបនឹងតម្រូវការនេះ TSMC កំពុងពង្រីកការវិនិយោគលើរោងចក្រផលិតបន្ទះឈីបនៅរដ្ឋអារីហ្សូណា សហរដ្ឋអាមេរិក ដោយគ្រោងចំណាយទឹកប្រាក់សរុប ២៦៥ ពាន់លានដុល្លារ ព្រមទាំងកំពុងពិចារណាលើគម្រោងសាងសង់រោងចក្រនៅរដ្ឋតិចសាស់ផងដែរ។ ការវិនិយោគក្នុង Anthropic និង OpenAI នេះបង្ហាញពីការពង្រីកតួនាទីរបស់ TSMC ពីការផលិតបន្ទះឈីបសម្រាប់វិស័យ AI ទៅជាការកាន់កាប់ភាគហ៊ុនក្នុងក្រុមហ៊ុនដែលកំពុងអភិវឌ្ឍបច្ចេកវិទ្យា AI ផងដែរ៕