(ភ្នំពេញ)៖ ក្រុមវិនិយោគិនទូទាំងពិភពលោកកំពុងសម្តែងការព្រួយបារម្ភយ៉ាងខ្លាំងថា ការលាលែងពីតំណែងយ៉ាងឆាប់រហ័សរបស់លោក Jensen Huang ចេញពីតួនាទីជាប្រធាន និងនាយកប្រតិបត្តិ (CEO) ព្រមទាំងចាកចេញពីសមាជិកក្រុមប្រឹក្សាភិបាលរបស់ក្រុមហ៊ុន Nvidia អាចនឹងជះឥទ្ធិពលអវិជ្ជមានយ៉ាងធ្ងន់ធ្ងរដល់ការផ្តល់ហិរញ្ញប្បទាន និងការរីកចម្រើននៃវិស័យបញ្ញាសិប្បនិម្មិត (AI) ទាំងមូល។

ការផ្លាស់ប្តូរតំណែងដ៏រញ្ជួយនេះ បានកើតឡើងជាផ្លូវការបន្ទាប់ពីមានរឿងអាស្រូវផ្ទាល់ខ្លួន និងការស៊ើបអង្កេតពីស្ថាប័នសន្តិសុខ ដែលនាំឱ្យក្រុមប្រឹក្សាភិបាលបើកកិច្ចប្រជុំបន្ទាន់ដើម្បីសម្រេចជោគវាសនារបស់មេដឹកនាំរូបនេះ។ ជាការឆ្លើយតប Nvidia បានតែងតាំងអ្នកស្រី Colette Kress (នាយកផ្នែកហិរញ្ញវត្ថុ ឬ CFO) ឱ្យឡើងកាន់តំណែងជា នាយកប្រតិបត្តិស្តីទី (Interim CEO) និងបានតែងតាំងអតីតនាយកប្រតិបត្តិក្រុមហ៊ុន Synopsys លោក Harvey Jones ឱ្យកាន់តំណែងជា ប្រធានក្រុមប្រឹក្សាភិបាល (Chair of the Board) ដំបូងគេបង្អស់របស់ក្រុមហ៊ុន ដែលចាប់តាំងពីក្រុមហ៊ុន Nvidia ត្រូវបានបង្កើតឡើងក្នុងឆ្នាំ ១៩៩៣ មក ក្រុមហ៊ុននេះមិនធ្លាប់មានតំណែង «ប្រធានក្រុមប្រឹក្សាភិបាល» ជាផ្លូវការនោះទេ។

ភ្លាមៗក្រោយដំណឹងនៃការលាលែងតំណែងនេះ ភាគហ៊ុនរបស់ក្រុមហ៊ុន Nvidia និងអតិថិជនសំខាន់ៗរបស់ខ្លួនបានធ្លាក់ចុះយ៉ាងខ្លាំងក្នុងទីផ្សារជួញដូរ ខណៈដែលភាគហ៊ុនរបស់ក្រុមហ៊ុនផលិតបន្ទះឈីបគូប្រជែងដូចជា Broadcom និង AMD បានកើនឡើង។ ក្រុមហ៊ុន Nvidia ត្រូវបានគេមើលឃើញថាជា «បេះដូង» នៃការកសាងហេដ្ឋារចនាសម្ព័ន្ធ AI ដោយសារបច្ចេកវិទ្យាបន្ទះឈីបឈានមុខគេ និងការវិនិយោគរាប់ពាន់លានដុល្លារក្នុងការគាំទ្រមជ្ឈមណ្ឌលទិន្នន័យ AI របស់អតិថិជនសកល។

អ្នកជំនាញទីផ្សារជាច្រើនបានលើកឡើងថា លោក Jensen Huang មិនត្រឹមតែជាមុខមាត់ និងស្ថាបនិកដែលដឹកនាំ Nvidia រយៈពេលជាង ៣៣ ឆ្នាំប៉ុណ្ណោះទេ ប៉ុន្តែលោកក៏ជា «អ្នកដឹកនាំចង្កូតកុងត្រូល (Chief Conductor)» ដ៏សំខាន់ក្នុងការកំណត់ទិសដៅបច្ចេកវិទ្យាកុំព្យូទ័រ និងសក្ដានុពល AI ទាំងមូល។ ការបាត់បង់រូបលោក គឺបង្កឱ្យមានភាពមិនច្បាស់លាស់យ៉ាងខ្លាំង។

ទោះជាយ៉ាងណា វិនិយោគិនមួយចំនួនក៏ជឿជាក់ថា គុណភាពផលិតផល GPU កម្រិតខ្ពស់របស់ Nvidia ព្រមទាំងការដឹកនាំបន្តពីសំណាក់អ្នកស្រី Colette Kress និងក្រុមការងារដែលមានបទពិសោធន៍ នឹងជួយរក្សាលំនឹងប្រតិបត្តិការអាជីវកម្មបណ្តោះអាសន្ន ខណៈដែលក្រុមហ៊ុនកំពុងស្វែងរក CEO ថ្មីទាំងក្នុង និងក្រៅស្ថាប័ន។

ចំណែកឯការប្រកាសរបាយការណ៍ប្រាក់ចំណូលត្រីមាសរបស់ Nvidia ដែលនឹងមកដល់នៅសប្តាហ៍ក្រោយ នឹងក្លាយជា «ចំណុចកណ្តាលនៃការតាមដានយ៉ាងយកចិត្តទុកដាក់បំផុត» ពីសំណាក់ទីផ្សារ Wall Street ថាតើដំណើរការអាជីវកម្ម និងផែនការយុទ្ធសាស្ត្របន្ទាប់នឹងត្រូវដំណើរការទៅយ៉ាងណាបន្តទៀត៕