(បរទេស)៖ ក្រុមខ្លាំងៗនៅអឺរ៉ុបមានដូចជា ប៊ែលហ្សិក អេស្ប៉ាញ និងអង់គ្លេស សុទ្ធសឹងរកបាន ៣ពិន្ទុដូចគ្នាយប់មិញនេះ ក្នុងប្រកួតទី៥ នៃពានរង្វាន់លីគអឺរ៉ុប UEFA Nations League 2026-27 លើកលែងតែមាន់គកបារាំងមួយគត់ ដែលត្រូវបានអ៉ីតាលីវាយបកឈ្នះ ៣-១ វិញ។

បិសាចក្រហមអឺរ៉ុប ប៊ែលហ្សិកបានយកឈ្នះម្ចាស់ផ្ទះតួកគីយ៉េ ២-១ ស្របពេលអាសូរីអ៉ីតាលី បានយកឈ្នះបារាំង អតីតជើងឯក UNL ជំនាន់ទី២ ក្នុងលទ្ធផល ៣ទល់នឹង១ វគ្គសន្សំពិន្ទុប្រចាំ League A ក្រុម១។

ជាមួយគ្នានោះដែរ សម្រាប់ប្រកួត League A ក្រុម៣ ម្ចាស់ជើងឯកពានរង្វាន់បាល់ទាត់ពិភពលោក World Cup 2026 គោជល់អេស្ប៉ាញនៅតែរក្សាប្រវត្តិមិនចាញ់ និងស្មើដដែល តាមយៈបំបាក់ម្ចាស់ផ្ទះសាធារណរដ្ឋឆេក ២-០ នៅពេលតោកំណាចអង់គ្លេសយកបាន ៣ពិន្ទុពីក្រូអាតដោយលទ្ធផល ២-១ នៅកីឡដ្ឋាន Wembley ក្នុងប្រកួតទី៥ ជើងទី២។

ក្នុងជំនួបខ្លាំងប៉ះខ្លាំងរវាងអ៉ីតាលី និងបារាំង ក្នុងកីឡដ្ឋាន San Siro ដោយមានអ្នកទស្សនាផ្ទាល់ប្រមាណជាង ៧ម៉ឺននាក់ផងនោះ Michael Olise មកពីក្លិប Bayern Munich ជាអ្នករកបានគ្រាប់នាំមុខសម្រាប់ក្រុមរបស់លោក Zinedine Zidane បន្ទាប់ពីចាប់ផ្តើមលេងបានតែ ១០នាទីប៉ុណ្ណោះ មុនពេលត្រូវបានម្ចាស់ផ្ទះវាយបកបាន ៣គ្រាប់វិញចាប់ពីនាទីទី២៦ មក។

វាជាការបរាជ័យលើកដំបូង ក្នុងចំណោមដឹកនាំ ៤ប្រកួតរបស់អតីតប្រធានក្រុម Zidane បន្ទាប់ពីឈ្នះ ៣លើកជាប់ៗគ្នារួចមក ហើយវាក៏ជាជ័យជម្នះក្នុងផ្ទះលើកដំបូងរបស់អ៉ីតាលីដែរទៅលើបារាំង គិតចាប់តាំងពីឆ្នាំ១៩៦២។

ក្រុមកំពូលតារាងទាំងពីរនឹងឡើងទៅវគ្គ ៨ក្រុមនៃ UNL ជាបន្តទៀត ក្រោយការប្រកួតចុងក្រោយនឹងធ្វើឡើងនាថ្ងៃអាទិត្យចុងសប្តាហ៍នេះ ដ្បិតប៊ែលហ្សិកត្រូវធ្វើម្ចាស់ផ្ទះទទួលអ៉ីតាលី ហើយបារាំងទទួលតួកគីយ៉េវិញម្តង៕