ត្រលប់ទៅអតីតកាល! ជប៉ុន នឹងដាក់លក់ទូរសព្ទស៊េរីមានប៊ូតង់ចុច ល្បីជំនាន់ឆ្នាំ២០០០
21-11-2026 09:02
(បរទេស)៖ ក្រុមហ៊ុនផ្តល់សេវាទូរសព្ទចល័តដ៏ធំមួយគឺ KDDI មានគម្រោងដាក់លក់ទូរសព្ទប្រភេទសាមញ្ញៗ ដែលអាចប្រើបានត្រឹមតែការហៅទូរសព្ទ ផ្ញើសារ និងមុខងារមូលដ្ឋានផ្សេងៗទៀតប៉ុណ្ណោះ។ ទូរសព្ទនេះនឹងមានរូបរាងតាមម៉ូដែល Infobar ដ៏ល្បីល្បាញ ដែលធ្លាប់ពេញនិយមយ៉ាងខ្លាំងនៅពេលដែលវាត្រូវបានបង្ហាញខ្លួនជាលើកដំបូងកាលពី ២៥ឆ្នាំមុន។
Dumbphone ឬ ទូរសព្ទដៃមិនសូវឆ្លាត ត្រូវបានដាក់សម្គាល់ឱ្យផ្ទុយពី Smartphone ឬទូរសព្ទឆ្លាតវៃ កំពុងចាប់ផ្តើមពេញនិយមឡើងវិញហើយនៅក្នុងសហរដ្ឋអាមេរិក និងអឺរ៉ុប។ ទូរសព្ទ Infobar Zero ដែលបានបើកឱ្យបញ្ជាទិញជាមុនកាលពីថ្ងៃពុធ ហើយនឹងដាក់លក់នៅថ្ងៃទី២៥ ខែធ្នូ នោះ មិនអាចភ្ជាប់អ៉ីនធឺណេតបានទេ។ ទូរសព្ទនេះមានបំពាក់កម្មវិធីចាក់តន្ត្រី និងកាមេរ៉ាទំហំ ២ មេហ្គាភិចសែល ដែលអនុញ្ញាតឱ្យអ្នកប្រើប្រាស់អាចថតរូបក្នុងរចនាប័ទ្មបុរាណដូចកាលពីដើមទសវត្សរ៍ឆ្នាំ២០០០។
ក្រុមហ៊ុន KDDI បានលើកឡើងនៅក្នុងសេចក្តីប្រកាសព័ត៌មានមួយថា នៅក្នុងយុគសម័យនេះ ក្នុងនាមជាក្រុមហ៊ុនមួយដែលផ្តល់ជូននូវបច្ចេកវិទ្យាបញ្ញាសិប្បនិម្មិត (AI) ដ៏ទំនើបបំផុត និងដំណោះស្រាយផ្នែកទំនាក់ទំនង ម៉ាកយីហោ au របស់យើងបានបង្ហាញពីចក្ខុវិស័យនាពេលអនាគតមួយ ដែលអ្នកអាចជ្រើសរើសរបៀបនៃការតភ្ជាប់ទំនាក់ទំនងដោយខ្លួនឯង ព្រមទាំងអាចបង្កើតបាននូវជម្រើសទូលំទូលាយមួយសម្រាប់អ្នកប្រើប្រាស់៕
ប្រភព៖ The Japan Times, JI JI







