ក្រុមហ៊ុនបច្ចេកវិទ្យាយក្ស YouTube ជិតឈានដល់កិច្ចព្រមព្រៀងទូទាត់សំណងជិត ៣ពាន់លានដុល្លារ ជុំវិញបណ្តឹងបង្កឱ្យមានការញៀនលើកុមារ
21-11-2026 10:32
(បរទេស)៖ ក្រុមហ៊ុនបច្ចេកវិទ្យាយក្ស YouTube ដែលស្ថិតក្រោមការគ្រប់គ្រងរបស់ Alphabet កំពុងខិតជិតឈានដល់កិច្ចព្រមព្រៀងជាប្រវត្តិសាស្ត្រ ក្នុងការទូទាត់សំណងទំហំប្រមាណ ៣ពាន់លានដុល្លារអាមេរិក ជាមួយបណ្តាមណ្ឌលសិក្សាធិការនៅសហរដ្ឋអាមេរិក ដើម្បីដោះស្រាយបណ្តឹងចោទប្រកាន់ថា ក្បួនដោះស្រាយបច្ចេកវិទ្យារបស់ខ្លួនបានបង្កឱ្យសិស្សានុសិស្សញៀននឹងការប្រើប្រាស់។ កិច្ចព្រមព្រៀងនេះកំពុងរង់ចាំការសម្រេចយល់ព្រមជាផ្លូវការពីចៅក្រមសហព័ន្ធ លោកស្រី Yvonne Gonzalez Rogers នៃរដ្ឋកាលីហ្វ័រញ៉ា។
ផ្អែកតាមពាក្យបណ្តឹងពីតំបន់សិក្សាធិការនានា រួមទាំងទីក្រុងញូវយ៉ក និងឡូសអាន់ជឺឡេស មុខងារបច្ចេកវិទ្យាសំខាន់ៗដូចជា ក្បួនដោះស្រាយណែនាំវីដេអូ, ការចាក់វីដេអូស្វ័យប្រវត្តិ, និងការអូសមើលគ្មានទីបញ្ចប់ ត្រូវបានរចនាឡើងដើម្បីទាក់ទាញចិត្តយុវវ័យ ដែលជាហេតុបង្កឱ្យប៉ះពាល់ធ្ងន់ធ្ងរដល់សុខភាពផ្លូវចិត្ត។ បញ្ហានេះបានបង្ខំឱ្យស្ថាប័នអប់រំត្រូវចំណាយថវិកាយ៉ាងច្រើនលើវិធានការទប់ស្កាត់ និងការគាំពារសុខភាពផ្លូវចិត្តដល់សិស្ស។
ទន្ទឹមនឹងនេះ ក្រុមហ៊ុនបច្ចេកវិទ្យាធំៗផ្សេងទៀតរួមមាន Meta, TikTok និង Snap ក៏កំពុងប្រឈមមុខនឹងចំណាត់ការផ្លូវច្បាប់ស្រដៀងគ្នានេះផងដែរ នៅក្នុងសវនាការសហព័ន្ធនាខែកុម្ភៈខាងមុខ។ ករណីនេះបានឆ្លុះបញ្ចាំងពីសម្ពាធកាន់តែខ្លាំងពីស្ថាប័នច្បាប់ និងអប់រំ ក្នុងការជំរុញឱ្យក្រុមហ៊ុនបច្ចេកវិទ្យាសកលទទួលខុសត្រូវខ្ពស់ចំពោះផលប៉ះពាល់នៃផលិតផលឌីជីថលលើសុខុមាលភាពអ្នកប្រើប្រាស់វ័យក្មេង៕









