(ភ្នំពេញ)៖ ការផ្ទុះអាវុធរវាងកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់ចំណុចផ្សេងៗទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់។

មកដល់ថ្ងៃទី២៨ ខែកក្កដា ឆ្នាំ២០២៨ ថៃបានបន្តប្រើយន្តហោះចម្បាំង F-16​ គ្រាប់បែកចង្កោម ដ្រូនអត្តឃាត គ្រាប់រ៉ូកែត និងមានការប្រើយន្តហោះបាញ់ផ្សែងពុល មកលើតំបន់ការពាររបស់កម្ពុជាថែមទៀត។

ហេតុនេះហើយ ថ្ងៃនេះ ​Fresh News នឹងចែករំលែកចំណេះដឹងទូទៅមួយ ដោយសង្ខេបពីអនុសញ្ញាគ្រាប់បែកចង្កោម ដូចខាងក្រោមនេះ៖

អនុសញ្ញាស្តីពីគ្រាប់បែកចង្កោមមានសារៈសំខាន់ក្នុងការកាត់បន្ថយគ្រោះថ្នាក់ ដែលបណ្តាលមកពីគ្រាប់បែកចង្កោមដែលបានប្រើប្រាស់នៅក្នុងប្រទេស និងបម្រើជាមូលដ្ឋានគ្រឹះសម្រាប់ការធានាសុវត្ថិភាពសាធារណៈ និងការអភិវឌ្ឍប្រកបដោយចីរភាព។

អនុសញ្ញានេះ ត្រូវបានចុះហត្ថលេខានៅទីក្រុង Oslo នៅថ្ងៃទី៣ ខែធ្នូ ឆ្នាំ២០០៨ ហើយចូលជាធរមាននៅថ្ងៃទី១ ខែសីហា ឆ្នាំ២០១០។ អនុសញ្ញានេះបានហាមឃាត់នូវការប្រើប្រាស់ ការអភិវឌ្ឍ ការផលិត ការទិញយក ឬស្តុកទុក និងការផ្ទេរគ្រាប់បែកចង្កោម ក៏ដូចជាជំនួយ ឬការចូលរួមសកម្មភាពហាមឃាត់ណាមួយ។

អនុសញ្ញានេះបានចូលជាធរមាននៅថ្ងៃទី១ ខែសីហា ឆ្នាំ២០១០។ រដ្ឋចំនួន៩៤ បានចុះហត្ថលេខា ហើយរដ្ឋចំនួន៤ បានផ្តល់សច្ចាប័នលើអនុសញ្ញានេះ នៅទីក្រុង Oslo នៅថ្ងៃទី៣-៤ ខែធ្នូ ឆ្នាំ២០០៨។ អនុសញ្ញានេះត្រូវបានបើកសម្រាប់ការចូលជាសមាជិកនៅទីស្នាក់ការអង្គការសហប្រជាជាតិ នៅទីក្រុងញូវយ៉ក។ មកដល់ពេលនេះ មានរដ្ឋ ៥១ បានផ្តល់សច្ចាប័ន៕