(ភ្នំពេញ)៖ កម្ពុជាក្នុងបរិបទស្រទ្បាញ់សន្ដិភាព! សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា តាមរយៈលិខិតចុះថ្ងៃទី៧ ខែសីហា ឆ្នាំ២០២៥ ដែលផ្ញើទៅកាន់គណៈកម្មាធិការពានរង្វាន់ណូបែលសន្ដិភាព បានស្នើសុំការតែងតាំង​ប្រធានាធិបតី​សហរដ្ឋ​អាមេរិក​ លោក ដូណាល់ ត្រាំ (Donald Trump) សម្រាប់​ពានរង្វាន់​ណូបែល​សន្តិភាព​ (Nobel Peace Prize) ក្នុងកិច្ចខិតខំប្រឹងប្រែងយ៉ាងសកម្មរបស់លោក ដែលធ្វើឲ្យកម្ពុជានិងថៃ ដាក់ចេញបទឈប់បាញ់ជាបន្ទាន់ និងដោយគ្មានលក្ខណ្ឌ។

តើអ្នកដឹងទេ គិតមកដល់ពេលនេះ ពានរង្វាន់​ណូបែល​សន្តិភាព​ (Nobel Peace Prize) ត្រូវបានផ្តល់ជូនប៉ុន្មានលើកហើយ?

មកដល់ពេលនេះ ពេលរង្វាន់ណូបែលសន្តិភាពត្រូវបានរៀបចំពិធីប្រគល់និងទទួលចំនួន ១០៥ដង ដល់ ១៤២ជ័យលាភី ដែលរួមមាន ជាបុគ្គលចំនួន ១១១នាក់ និងអង្គការចំនួន ៣១ស្ថាប័ន។

គួរកត់សម្គាល់ថា ស្ថាប័នមួយចំនួន បានទទួលរង្វាន់នេះ ជាច្រើនដងដូចជា៖

*គណៈកម្មាធិការអន្តរជាតិនៃកាកបាទក្រហម បានទទួល ៣ដង (1917, 1944, និង 1963)
*ការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានទទួល ២ដង (1954 និង 1981)។

គួរជម្រាបថា ពានរង្វាន់ណូបែលសន្តិភាព ដែលត្រូវបានបង្កើតឡើងក្នុងឆ្នាំ១៨៩៥ ដោយលោក Alfred Nobel បានខកខានការប្រគល់រង្វាន់ដល់ជ័យលាភី ១៩ឆ្នាំហើយ ដោយសារមានជម្លោះសកល ឬរកជ័យលាភីដែលស័ក្តិសមមិនទាន់បាន៕