(ហ្សាការតា)៖ រថភ្លើងល្បឿនលឿនដំបូងគេក្នុងតំបន់អាស៊ាន គឺផ្លូវរថភ្លើងល្បឿនលឿន «ក្រុងហ្សាការតា-បានឌុង» របស់ប្រទេសឥណ្ឌូណេស៊ី ដែលដាក់ឱ្យដំណើរការជាផ្លូវការក្នុងខែតុលា ឆ្នាំ២០២៣។

វាត្រូវបានដាក់ឈ្មោះថា «Whoosh» ដែលតំណាងឱ្យ Waktu Hemat, Operasi Optimal, ប្រព័ន្ធ Handal (មានន័យថា «សន្សំពេលវេលា ប្រតិបត្តិការល្អបំផុត ប្រព័ន្ធដែលអាចទុកចិត្តបាន»)។ រថភ្លើងតភ្ជាប់ពីទីក្រុងហ្សាការតា ទៅក្រុងបានឌុង ត្រឹមតែ ៣០នាទី ឬ ៤៥នាទី ខណៈការធ្វើដំណើរដោយឡានពីមុន ចំណាយពេល ៣ម៉ោង។

វាត្រូវបានសាងសង់ឡើងតាមរយៈការសហការរវាងប្រទេសឥណ្ឌូនេស៊ី និងប្រទេសចិន គម្រោងនេះគឺជាផ្នែកមួយនៃគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិន ហើយប្រើប្រាស់បច្ចេកវិទ្យាទំនើប CR400AF Fuxing ដែលមានសមត្ថភាពអាចបង្កើនល្បឿនដល់ទៅ ៣៥០គីឡូម៉ែត្រក្នុងមួយម៉ោង។ Whoosh លាតសន្ធឹងប្រហែល ១៤២គីឡូម៉ែត្រ និងជានិមិត្តរូបនៃការប្តេជ្ញាចិត្តកាន់តែខ្លាំងឡើងរបស់អាស៊ានចំពោះប្រព័ន្ធដឹកជញ្ជូនទំនើប និរន្តរភាព និងទំនាក់ទំនងអន្តរតំបន់។

ការប៉ាន់ប្រមាណតម្លៃដំបូង គឺប្រហែល ៤.៣ពាន់លានដុល្លារអាមេរិក ប៉ុន្តឬនៅពេលដែលការសាងសង់ជិតបញ្ចប់ ថវិកាបានកើនឡើងដល់ប្រហែល ៧.៣ពាន់លានដុល្លារអាមេរិក ភាគច្រើនដោយសារតែការពន្យាពេលទិញដី ការរំខាននៃជំងឺរាតត្បាត និងការពង្រឹងស្តង់ដារវិស្វកម្ម៕