(កំពង់ឆ្នាំង)៖ ភ្នំទេពី ស្ថិតក្នុងភូមិកំពង់បឹង ឃុំកំពង់ហៅ ស្រុកកំពង់លែង ខេត្តកំពង់ឆ្នាំង នៅចម្ងាយ៤០០ម៉ែត្រពីស្ទឹងជីនិត ក្នុងតំបន់ទំនាបទឹកលិចនៅក្នុងរដូវវស្សា។

ភ្នំទេពីមានប្រាសាទនិងគ្រឹះប្រាសាទដូចជា៖

*នៅលើកំពូលភ្នំខ្ពស់បំផុត មានប្រាសាទឥដ្ឋរាងបួនជ្រុងស្មើ មានផ្តែរសម័យមុនអង្គរ សរសរពេជ្រសម័យអង្គរ និងបំណែកឥដ្ឋប្រាសាទជាច្រើន មានសំណង់ខ្ទមអ្នកតាទើបសង់ថ្មីតម្កល់បដិមានាងទេពីធ្វើពីស៊ីម៉ងតិ៍។

*លើកំពូលភ្នំបន្ទាប់ (ទី២) មានបំណែកឥដ្ឋប្រាសាទជាច្រើន។

*នៅគន្លាក់ទី៣ ចំទីធ្លាជាប់នឹងផ្លូវឡើងភ្នំ មានប្រាសាទនៅសល់ត្រឹមខឿនថ្មបាយក្រោម គ្រឿងបង្គំប្រាសាទជាច្រើនធ្វើពីថ្មភក់ និងផ្ដែរសម័យសម្បូរព្រៃគុក។

*នៅលើភ្នំខាងលិច ក៏មានប្រាសាទឥដ្ឋដែលគេឃើញនៅតែគំនរឥដ្ឋ និងថ្ម។

បេតិកភណ្ឌដែលមាននៅលើភ្នំទេពីដូចដែលបានរៀបរាប់ខាងលើ គឺជាសក្ដានុពលយ៉ាងសំខាន់សម្រាប់អភិវឌ្ឍទេសចរណ៍ក្នុងតំបន់ ពិសេសទេសចរណ៍ក្នុងស្រុកកំពង់លែង ខេត្តកំពង់ឆ្នាំងនេះ៕