(សាណា)៖ ក្រុមហ៊ូធី (Houthi) ដែលកាន់កាប់ក្រុងរដ្ឋបាល នៅប្រទេសយេម៉ែន បានបញ្ជាក់នៅថ្ងៃសៅរ៍ ទី២៨ ខែមីនា ឆ្នាំ២០២៦ថា ពួកគេបានបើកការវាយប្រហារលើអ៉ីស្រាអែល ជាលើកដំបូង ក្នុងអំឡុងសង្រ្គាមបច្ចុប្បន្ន រវាងអ៉ីស្រាអែល-អាមេរិក ជាមួយអ៉ីរ៉ង់។

ហ៊ូធី តែងតែចាត់ទុកខ្លួនឯង ថាជាតំណាងរដ្ឋាភិបាលស្របច្បាប់យេម៉ែន ប៉ុន្តែត្រូវបានអន្តរជាតិចាត់ទុកជាក្រុមឧទ្ទាម។

តើក្រុមហ៊ូធី ជានរណា?

ក្រុមហ៊ូធី ឬហៅថា «Ansar Allah» (អ្នកគាំទ្រព្រះ) គឺជាចលនាឧទ្ទាមប្រដាប់អាវុធបែបនយោបាយ និងសាសនាស៉ីអ៉ីត និកាយហ្សៃឌី (Shiite Zaidi) នៅក្នុងប្រទេសយេម៉ែន ដែលបានងើបឡើងក្នុងទសវត្សរ៍ឆ្នាំ១៩៩០។ ក្រុមនេះគ្រប់គ្រងរដ្ឋធានីសាណា (Sanaa) និងតំបន់ភាគច្រើននៃភាគខាងជើងយេម៉ែន ដោយមានការគាំទ្រពីអ៉ីរ៉ង់ និងប្រឆាំងនឹងសម្ព័ន្ធមិត្តអារ៉ាប៊ីសាអូឌីត។

ចាប់តាំងពីចុងទសវត្សរ៍ឆ្នាំ១៩៩០ គ្រួសារហ៊ូធីនៅភាគខាងជើងប្រទេសយេម៉ែន បានចាប់ផ្តើមចលនារស់ឡើងវិញខាងសាសនាសម្រាប់និកាយហ្សៃឌី នៃសាសនាអ៉ីស្លាមស៊ីអ៉ីត ដែលធ្លាប់គ្រប់គ្រងប្រទេសយេម៉ែន ប៉ុន្តែតំបន់ភាគខាងជើងកណ្តាលរបស់ពួកគេបានក្លាយជាជនក្រីក្រ និងត្រូវបានគេដាក់ឲ្យនៅដាច់ដោយឡែក។

នៅពេលដែលជម្លោះជាមួយ រដ្ឋាភិបាលកាន់តែធ្ងន់ធ្ងរឡើង ពួកគេបានធ្វើសង្គ្រាមទ័ពព្រៃជាបន្តបន្ទាប់ប្រឆាំងនឹងកងទ័ពជាតិ ដែលនាំឱ្យមានការប៉ះទង្គិចគ្នាតាមព្រំដែនរយៈពេលខ្លីជាមួយប្រទេសមហាអំណាចមូស្លីមនិកាយស៊ុននី អារ៉ាប៊ីសាអូឌីត។

សង្គ្រាមស៉ីវិលនៅយេម៉ែន

សង្គ្រាមបានចាប់ផ្តើមនៅចុងឆ្នាំ២០១៤ នៅពេលដែលរដ្ឋធានីសាណា ត្រូវបានដណ្តើមយកដោយពួកឧទ្ទាមហ៊ូធី។ ដោយមានការព្រួយបារម្ភអំពីឥទ្ធិពលស៊ីអ៉ីតដែលកំពុងកើនឡើងតាមបណ្តោយព្រំដែនរបស់ខ្លួន អារ៉ាប៊ីសាអូឌីតបានដឹកនាំក្រុមចម្រុះដែលគាំទ្រដោយលោកខាងលិច ហើយបានធ្វើអន្តរាគមន៍ក្នុងសង្គ្រាមស៊ីវិលនៅយេម៉ែន ក្នុងខែមីនា ឆ្នាំ២០១៥ ដើម្បីគាំទ្ររដ្ឋាភិបាល ដែលគាំទ្រដោយទីក្រុងរីយ៉ាដ។

ក្រុមហ៊ូធី បានបង្កើតការគ្រប់គ្រងលើភាគខាងជើងប្រទេសយេម៉ែនភាគច្រើន និងមជ្ឈមណ្ឌលប្រជាជនសំខាន់ៗផ្សេងទៀត ខណៈដែលរដ្ឋាភិបាលដែលទទួលស្គាល់ដោយអន្តរជាតិមានមូលដ្ឋាននៅទីក្រុងអាដិន។

ទំនាក់ទំនងជាមួយអ៉ីរ៉ង់

ក្រុមហ៊ូធី បានបង្ហាញពីសមត្ថភាពមីស៊ីល និងយន្តហោះគ្មានមនុស្សបើករបស់ពួកគេនៅក្នុងសង្គ្រាមយេម៉ែន ជាមួយនឹងការវាយប្រហារទៅលើប្រទេសអារ៉ាប៊ីសាអូឌីត និងសហព័ន្ធអេមីរ៉ាតអារ៉ាប់រួម (UAE) ដោយផ្តោតជាចម្បងលើរោងចក្រប្រេង និងហេដ្ឋារចនាសម្ព័ន្ធសំខាន់ៗ។

ក្រុមចម្រុះដឹកនាំ ដោយអារ៉ាប៊ីសាអូឌីត ចោទប្រកាន់អ៉ីរ៉ង់ពីបទផ្តល់អាវុធ បណ្តុះបណ្តាល និងផ្តល់ហិរញ្ញប្បទានដល់ក្រុមហ៊ូធី។ ទោះយ៉ាងណា ក្រុមនេះបានបដិសេធរឿងនេះ ហើយទទូចថាពួកគេកំពុងអភិវឌ្ឍអាវុធផ្ទាល់ខ្លួន៕