ចំណេះដឹងទូទៅ៖ លក្ខណៈ ៣១យ៉ាង របស់ស្ត្រីគ្រប់លក្ខណ៍ និងលក្ខណៈ ២៦យ៉ាង របស់បុរសគ្រប់លក្ខណ៍
24-04-2026 21:58
(ភ្នំពេញ)៖ ឯកសារខ្មែរបុរាណ បានកំណត់ពីលក្ខណៈ ៣១យ៉ាង របស់ស្ត្រីគ្រប់លក្ខណ៍ និងលក្ខណៈ ២៦យ៉ាង របស់បុរសគ្រប់លក្ខណ៍។ ប៉ុន្តែ នៅក្នុងសៀវភៅសុជីវធម៌ប្រចាំសង្គមគ្រួសារ បានឲ្យដឹងថា លក្ខណៈទាំងនោះហួសសម័យខ្លះទៅហើយ ដែលសម័យនេះមនុស្សលោកធ្វើត្រាប់តាមពុំកើត។
ស្រ្តី ដែលប្រកបដោយ លក្ខណៈ៣១យ៉ាង ហៅថា ស្រីគ្រប់លក្ខណ៍ រួមមាន៖
*១. មិនចេះអេចអូចនិយាយដើមគេ
*២. ចេះគួរសមក្រោកទទួលមាតាបិតានិងស្វាមី
*៣. ដឹងគុណ តបគុណ មាតាបិតាញាតិសន្តាន ទាំងពីរខាង
*៤. មិនចេះដេកថ្ងៃ
*៥. មិនភ្លីភ្លើភ្លេចមុខភ្លេចក្រោយ
*៦. ចេះថែទាំរបស់ទ្រព្យ
*៧. មិនផិតក្បត់ស្វាមី
*៨. មិនចេះប្រចណ្ឌស្វាមី
*៩. គ្មានកលមាយា
*១០. មិនរំសាយសក់ឲ្យគេឃើញ
*១១. មានចិត្តអត់ធន់ធ្ងន់ធ្ងរ
*១២. មានជើងស្រាលមិនដើរតន្ត្រំក្តុងក្តាំង
*១៣. មិនឈរ ឬអង្គុយសំញែងកាយឲ្យគេឃើញ
*១៤. មិនដើរញ៉ិកញ៉ក់កាច់រាង
*១៥. ចេះសង្រួមភ្នែកមិនក្រឡេករឡេមរឡាម
*១៦. មានដំណើរល្អ មិនគ្រលែងកាយចំទយគូទ
*១៧. មិនបង់បោយញាក់ស្មា គ្រលែងដើមដៃ
*១៨. មានសំឡេងតិចច្បាស់លាស់ មិននិយាយឡូឡា
*១៩. មិនចេះឡេះឡោះលេងសើច
*២០. មិននិយាយផ្តោះផ្តងចំពោះបុរសនិងស្រ្តី
*២១. មិនទម្រន់ ធ្វើការណាធ្វើទាល់តែហើយការនោះ
*២២. ទៅទីណាឆាប់ត្រឡប់វិញ មិនញៀនអង្គុយផ្ទះគេ
*២៣. ចេះទុកដាក់អីវ៉ាន់ក្នុងពេលគួរទុកដាក់
*២៤. ចេះរៀបចំផ្ទះសំបែង
*២៥. ចេះតុបតែងគ្រឿងឧបភោគបរិភោគ
*២៦. ខ្លាចចិត្តស្វាមីមាតាបិតា ហើយគោរពតាមឱវាទ
*២៧. បរិភោគចំណីអាហារ ក្រោយស្វាមីនិងមាតាបិតា
*២៨. ឈប់បរិភោគ មុនស្វាមីនិងមាតាបិតា
*២៩. ដេកលក់ក្រោយស្វាមី
*៣០. ភ្ញាក់មុនស្វាមី
*៣១. មានមេត្តាករុណាចេះធ្វើបុណ្យទាន។
ស្ត្រីដែលប្រកបដោយលក្ខណៈគ្រប់ពេញលេងញទាំង ៣១ខនេះ ហៅថា ស្ត្រីគ្រប់លក្ខណ៍ តែបើមិនពេញលេញទេមានខ្វះខាតខ្លះ ហៅថា ស្ត្រីខាតលក្ខណ៍។ បើមានតែត្រង់នេះខ្លះ ត្រង់នោះខ្លះរដាច់រដោច ហៅថា ស្ត្រីដាច់លក្ខណ៍។
បុរសដែលប្រកបដោយលក្ខណៈ ២៦យ៉ាង ហៅថាប្រុសគ្រប់លក្ខណ៍ រួមមាន៖
*១. ឧស្សាហ៍ខ្នះខ្នែងធ្វើការរៀនសូត្រមិនប្រកាន់ខ្លួន
*២. មិនចេះលួចប្លន់កេងកិបឆរបោក
*៣. មិនឈ្លានពានចំពោះកូនប្រពន្ធអ្នកដទៃ
*៤. មិនរំភើបញាប់ញ័រ ភ័យអរផ្តេសផ្តាស
*៥. មិនកុហកភូតភរ ឲ្យលើសពីការពិត
*៦. មិននិយាយត្រាប់ឲ្យអៀនខ្មាស់
*៧ . បានឮដំណឹងហើយវិនិច្ឆ័យសិន ទើបជឿជាក្រោយ
*៨. ធ្វើការមិនរួសរាន់ពេកមិនយឺតយូរពេក
*៩. មិនចេះនិយាយបំភ្លើសសើចលេង
*១០. ចេះទទួលភ្ញៀវពន្លឺមិនលាក់មុខ
*១១. មានថ្នាំកែរោគបម្រុងទុកមិនឲ្យខ្វះពេលត្រូវការ
*១២. មិនប្រាប់ការសម្ងាត់ដល់អ្នកដទៃ
*១៣. មិនផ្ញើរបស់ទុកនឹងបុគ្គលមិនគួរផ្ញើ
*១៤. មានចិត្តអត់ធន់តស៊ូមិនញ៉ាក
*១៥. មានភក្តីភាពចំពោះចៅហ្វាយនាយ
*១៦. មិនចេះឡឹកឡក់ចំពោះស្រីក្រមុំ
*១៧. ស្គាល់ចំណេញស្គាល់ខាត
*១៨. រកប្រដាប់តុបតែងខ្លួនឲ្យភរិយាបុត្រធីតា និងខ្លួនឯង
*១៩. មិនទិញជឿនូវរបស់ប្រើប្រាស់គ្រប់យ៉ាង
*២០. ដឹងគុណ តបគុណ សរសើរគុណ នៃអ្នកមានគុណ
*២១. គោរពតាមឱវាទ មាតាបិតាញាតិមិត្រ និងអ្នកប្រាជ្ញ
*២២. ចេះអត់ទ្រាំស្តាប់ នូវពាក្យដែលគេស្តីបន្ទោសប្រដៅ
*២៣. មានកាយវាចា សមរម្យមិនឆ្គង
*២៤. ឲ្យដំណឹងមនុស្សក្នុងផ្ទះហើយ ទើបចេញទៅ
*២៥. ចេះវាយប្រដៅកូនដោយរំពាត់យ៉ាងតូច
*២៦. ខឹងឆាប់បាត់មិនចងកំហឹងទុក។
បុរសដែលប្រកបដោយលក្ខណៈគ្រប់ពេញទាំង ២៦ ហៅថាប្រុសគ្រប់លក្ខណ៍ បើមិនពេញលេញទេ មានខ្វះខាតខ្លះ ហៅថាប្រុសខាតលក្ខណ៍ បើមានតែត្រង់នេះខ្លះត្រង់នោះខ្លះរដាច់រដោច ហៅថាប្រុសដាច់លក្ខណ៍ ឬអាកំបាក់ទន្សា៕
