(ភ្នំពេញ)៖ នៅថ្ងៃទី២៥ ខែមិថុនា ឆ្នាំ២០២៦ ផ្ទាលផ្ទៀងផ្ទាត់ឯកសារ verify.gov.kh បានឈ្នះពានរង្វាន់ សេវាសាធារណៈអង្គការសហប្រជាជាតិ ឆ្នាំ២០២៦ ជាសេវាសាធារណៈដែលមានតម្លាភាព និងគណនេយ្យភាព (Transparent and accountable public institutions to achieve the SDGs) បន្ទាប់ពីឆ្លងកាត់ការជម្រុះជាច្រើនលើក ក្នុងចំណោមប្រព័ន្ធចំនួនជាង៧០០ មកពី ៦២ប្រទេស ជុំវិញពិភពលោក។

ពានរង្វាន់នេះ ត្រូវបានប្រគល់ជូនកម្ពុជានៅក្នុងវេទិកាសេវាសាធារណៈអង្គការសហប្រជាជាតិ (United Nations Public Service Forum) ក្រោមប្រធានបទ «បរិវត្តកម្មស្ថាប័នសាធារណៈ៖ ការលើកកម្ពស់នវានុវត្តន៍ គណនេយ្យភាព ការចូលរួម និង បរិយាបន្ន» នៅទីក្រុងប៊ីលីស៊ី ប្រទេសហ្សកហ្ស៊ី។

តើវេទិកាសេវាសាធារណៈអង្គការសហប្រជាជាតិ ជាអ្វី?

វេទិកាសេវាសាធារណៈអង្គការសហប្រជាជាតិ គឺជាព្រឹត្តិការណ៍អន្តរជាតិដ៏សំខាន់មួយ ដែលរៀបចំឡើងដោយនាយកដ្ឋានកិច្ចការសេដ្ឋកិច្ច និងសង្គមរបស់អង្គការសហប្រជាជាតិ (UN DESA)។ វេទិកានេះ បង្កើតឡើងដើម្បីជាកន្លែងពិភាក្សា ផ្លាស់ប្តូរបទពិសោធន៍ និងលើកកម្ពស់ការច្នៃប្រឌិត ក្នុងការគ្រប់គ្រងរដ្ឋបាលសាធារណៈ។

ព្រឹត្តិការណ៍នេះ ត្រូវបានរៀបចំឡើងជារៀងរាល់ឆ្នាំ ក្នុងគោលបំណងសំខាន់ៗដូចខាងក្រោម៖

*ចែករំលែកការអនុវត្តល្អបំផុត៖ ផ្តល់ឱកាសដល់មេដឹកនាំពិភពលោក អ្នកបង្កើតគោលនយោបាយ និងអ្នកជំនាញ ក្នុងការពិភាក្សាលើបញ្ហាប្រឈម និងដំណោះស្រាយនានា ក្នុងវិស័យរដ្ឋបាលសាធារណៈ។

*ការអភិវឌ្ឍសមត្ថភាព៖ ផ្តោតលើការធ្វើទំនើបកម្មស្ថាប័នរដ្ឋ ការធ្វើបរិវត្តកម្មឌីជីថល និងយុទ្ធសាស្ត្រនានា ដើម្បីគាំទ្រដល់ការសម្រេចគោលដៅអភិវឌ្ឍន៍ប្រកបដោយចីរភាព (SDGs) របស់អង្គការសហប្រជាជាតិ។

*ការប្រគល់ពានរង្វាន់ (UNPSA)៖ ព្រឹត្តិការណ៍នេះតែងតែប្រព្រឹត្តទៅស្របពេលនឹងវេទិកាសេវាសាធារណៈអន្តរជាតិ (ខែមិថុនា)។ ក្នុងឱកាសនោះ អង្គការសហប្រជាជាតិ តែងតែរៀបចំពិធីប្រគល់ពានរង្វាន់សេវាសាធារណៈអង្គការសហប្រជាជាតិ (United Nations Public Service Awards - UNPSA) ដើម្បីទទួលស្គាល់ស្ថាប័នរដ្ឋ ឬរដ្ឋបាលថ្នាក់ក្រោមជាតិណា ដែលមានភាពលេចធ្លោ និងច្នៃប្រឌិតខ្ពស់ក្នុងការបម្រើសេវាសាធារណៈ។

តើប្រភេទពានរង្វាន់ទាំង៤ នៃកម្មវិធី UNPSA មានអ្វីខ្លះ?

ប្រភេទពានរង្វាន់ទាំង៤ នៃកម្មវិធីពានរង្វាន់សេវាសាធារណៈអង្គការសហប្រជាជាតិ (UNPSA) ត្រូវបានរៀបចំឡើងដើម្បីជំរុញការសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាព (SDGs)។

យោងតាមការធ្វើបច្ចុប្បន្នភាពចុងក្រោយ ប្រភេទពានរង្វាន់ទាំង៤ រួមមាន៖

*១. ការផ្តល់សេវាប្រកបដោយបរិយាបន្ន និងសមធម៌ ដើម្បីកុំឱ្យនរណាម្នាក់នៅដាច់ដោយឡែក (Delivering inclusive and equitable services to leave no one behind)៖ ផ្តល់ជូនដល់គំនិតផ្តួចផ្តើម ដែលផ្តោតលើការផ្តល់សេវាសាធារណៈដល់គ្រប់ស្រទាប់វណ្ណៈ ជាពិសេសក្រុមមនុស្សដែលងាយរងគ្រោះ ជនពិការ ឬជនជាតិភាគតិច។

*២. សេវាសាធារណៈដែលឆ្លើយតបនឹងយេនឌ័រ (Gender-responsive public services)៖ ផ្តល់ជូនស្ថាប័ន ដែលបានបង្កើតកម្មវិធី ឬសេវាកម្មដែលលើកកម្ពស់សមភាពយេនឌ័រ និងជួយបង្កើនឱកាស ឬសេដ្ឋកិច្ចសម្រាប់ស្ត្រីនៅក្នុងសហគមន៍។

*៣. ស្ថាប័នសាធារណៈដែលមានតម្លាភាព និងគណនេយ្យភាព ដើម្បីសម្រេចបាននូវ SDGs (Transparent and accountable public institutions to achieve the SDGs)៖ ផ្តល់ជូនដល់ស្ថាប័ន ដែលបានកែទម្រង់រដ្ឋបាល បង្កើនភាពស្មោះត្រង់ ប្រឆាំងអំពើពុករលួយ និងការប្រើប្រាស់បច្ចេកវិទ្យាឌីជីថល ដើម្បីធានាតម្លាភាព (ជាក់ស្តែងប្រព័ន្ធ verify.gov.kh របស់កម្ពុជា ក៏បានឈ្នះពានរង្វាន់ក្នុងវិស័យនេះដែរ)។

*៤. ការចូលរួម និងការបំផុសគំនិតសាធារណៈសម្រាប់ដោះស្រាយបញ្ហាប្រកបដោយបរិយាបន្ន (Participation and public engagement for inclusive decision-making)៖ ផ្តល់ជូនដល់យន្តការដែលបើកឱកាសឱ្យប្រជាពលរដ្ឋ និងសហគមន៍មូលដ្ឋានបានចូលរួមមតិ ឬធ្វើសេចក្តីសម្រេចចិត្តរួមគ្នាជាមួយរដ្ឋាភិបាល៕