(ភ្នំពេញ)៖ បាតុភូតជីវសាស្ត្រដ៏កម្រមួយ បានទាក់ទាញចំណាប់អារម្មណ៍អន្តរជាតិ បន្ទាប់ពីការរកឃើញថា បងប្អូនស្រីភ្លោះជនជាតិអង់គ្លេសពីរនាក់ គឺ Michelle និង Lavinia Osbourne កើតចេញពីឪពុកផ្សេងគ្នា។

បងប្អូនស្រីទាំងពីរ បានដឹងការពិតនៅអាយុ ៤០ឆ្នាំ បន្ទាប់ពីការធ្វើតេស្ត DNA បានលាតត្រដាងអាថ៌កំបាំង ដែលលាក់កំបាំងតាំងពីកំណើតរបស់ពួកគេនៅឆ្នាំ១៩៧៦។

យោងតាម BBC បងប្អូនស្រីទាំងពីរនាក់នេះ គឺស្ថិតក្នុងស្ថានភាពដ៏កម្របំផុតមួយ ដែលគេស្គាល់ថាជា heteropaternal superfecundation។ ករណីនេះកើតឡើងនៅពេលដែលស្ត្រីបញ្ចេញពងពីរក្នុងវដ្តតែមួយ ហើយពងទាំងនោះត្រូវបានបង្កកំណើតដោយបុរសពីរនាក់ផ្សេងគ្នាក្នុងរយៈពេលខ្លី។ ឧទាហរណ៍ថា ស្ត្រីម្នាក់រួមភេទជាមួយបុរសម្នាក់នៅពេលព្រឹក ហើយថ្ងៃឡើងរួមភេទជាមួយបុរសម្នាក់ទៀត។

អ្នកជំនាញផ្នែកវេជ្ជសាស្ត្របានកត់សម្គាល់ថា ករណីនេះគឺជាករណីដ៏កម្របំផុតមួយនៅក្នុងជីវវិទ្យាមនុស្ស។ ជាមួយនឹងករណីប្រហែល ២០ ប៉ុណ្ណោះ ដែលត្រូវបានកត់ត្រាទូទាំងពិភពលោក បងប្អូនស្រីខាងលើ ត្រូវបានគេជឿថាជាករណីតែមួយគត់ដែលត្រូវបានកត់ត្រានៅចក្រភពអង់គ្លេស។

លទ្ធផលបានរកឃើញនៅថ្ងៃទី ១៤ ខែកុម្ភៈ ឆ្នាំ២០២២ ដែលជាថ្ងៃដែលម្តាយរបស់ពួកគេបានទទួលមរណភាពផងដែរ។ ពេលវេលានេះមានន័យថា បងប្អូនស្រីភ្លោះមិនអាចសួរម្តាយរបស់ពួកគេអំពីការពិតជុំវិញកាលៈទេសៈនៃការមានគភ៌របស់ពួកគេបានឡើយ។

Lavinia បានបង្កើតទំនាក់ទំនងជាមួយឪពុកបង្កើតរបស់នាង គឺលោក Arthur ខណៈដែល Michelle បានជួបឪពុករបស់នាង គឺលោក Alex ប៉ុន្តែបានសម្រេចចិត្តមិនរក្សាទំនាក់ទំនង ដោយសារតែបញ្ហាផ្ទាល់ខ្លួនរបស់គាត់ជាមួយនឹងការញៀនថ្នាំ៕